Gatime
Si të dallojmë mjaltin bio? Live në studion e “Ditë e Re” improvizohet vjelja e mjaltit me makineri tradicionale shqiptare
Vjelja e mjaltit është një nga proceset më të rëndësishme tek bleta. Bletërritësi, Denald Gjata, improvizon në studion e “Ditë e Re” në RTV Ora procesin e vjeljes me makineri tradicionale shqiptare.
Kjo është hera e parë që në një studio televizive improvizohet live procesi i vjeljes së mjaltit.
Bletërritësi shpjegon hapa pas hapi procesin dhe sekretet e vjeljes, duke theksuar se përdorimi i makinerive moderne duhet bërë me kujdes, pasi mjalti mund të digjet.
“Me makineritë moderne duhet të kemi kujdes, pasi shpejtësia e makinerisë mund ta djegë mjaltin, duke marrë një erë jo të këndshme. Mjalti i djegur bëhet shumë i skuqur dhe kur e konsumon të djeg fytin”, thotë bletërritësi për moderatorët Arjola Shehu dhe Arjon Muça.
Vulosja e mjaltit luan rol të rëndësishëm në cilësinë dhe rezistencën e tij.
“Vulosja ndodh kur mjalti është totalisht i pjekur kur poret e kosheres janë të gjitha të mbyllura. Në momentin që mjalti vuloset mirë, ai shkon diku te 100 vite pa u prishur. Kjo është garancia që i jep bleta. Në momentin që poret e kosheres janë të hapura, mjalti prishet për një muaj. Kjo ndodh sepse ka lagështi në mjaltë, gjë që ndikon te thartimi dhe prishja e mjaltit.”
Sa mjalt mund të nxjerrim nga një kornizë/ pite mjalti?
Denald Xhafa: Varet se sa e vulosur është pitja dhe sa sasi mjalti ka. Një kornizë që peshon 3.2 kilogramë mund të nxjerrë të paktën 2.5 kilogramë mjaltë.
Pse procesi i parë i vlejles ndodh në këtë periudhe të vitit (korrik)?
Denald Xhafa: Ky proces ndodh në këtë periudhë, sepse tani është koha e duhur e grumbullimit të mjaltit nga bletët. Këtë prodhim mund ta marrim një herë ose dy herë në vit, që bleta e prodhën që nga maji deri në gusht. Qershor, korrik, gusht janë tre muajt e artë për vjeljen e mjaltit. Për qumështin e bletës është një periudhë tjetër.
Si të testojmë nëse mjalti është i mirë?
Denald Xhafa: Marrim një pjatë, vendosim ujë të vakët dhe një lugë mjaltë, i trazojmë. Nëse mjalti bëhet një me ujin, pra nëse lidhet me ujin, atëherë nuk është mjalt cilësor.
