Ministrja e Financave, Anila Denaj ka deklaruar se Shqipëria do ta paguajë dëmshpërblimin prej 110 milionë euro biznesmenit italian Francesco Becchetti, vetëm pasi gjykata të japë vendimin e formës së prerë.

Në një intervistë në emisionin “Përballë”, ministrja theksoi se qeveria shqiptare është në pritje të përgjigjes nga Avokatura e Shtetit.

 “Ne patjetër që do ta paguajmë. Hyn edhe në negociata. Po në rastin e Beketit, ne jemi në pritje të përgjigjes nga Avokatura e Shtetit. Ne nuk mundemi dhe juridikisht të buxhetojmë procesin nese  Avokatura e Shtetit nuk thotë tani ky vendim duhet zbatuar. Ka procese dhe ka kontrata që nëse do të negocioheshin në kohë mund të kishin kompensuar dhe dëmin e fitimit të gjyqit.

Dhe sa më shumë ta lëmë në kohë, jemi duke shtyrë një proces që nuk është në të mirë të shqiptarëve. Nuk po flas për rastin konkret këtu. Por në momentin që procedurat finalizohen atëherë janë detyruese për buxhetin e shtetit. Dhe ata kanë vëmendjen për tu paguar proporcionalisht sipas fondeve. Nëse vjen e formës së prerë do të duhet të hiqet një fond nga një proces tjetër”, tha Denaj.