Temperaturat e larta shkaktojnë probleme shëndetësore tek të sëmurët kronikë, por edhe tek të tjerët shkaktojnë stres dhe ankth. Mjekja psikiatre Arjana Rreli thotë se në disa raste këto gjendje mund të çojnë deri në konflikte ekstreme, pasi tek çdo person ka ndikim negativ.

“Kur këto temperatura tejkalohen ndizet një alarm që sigurisht ka shenjat e veta tek çdo person. Por shfaqet edhe me një rritje të nivelit të ankthit dhe me rritjen ne nivelit të ankthit rritet tërthorazi në disa persona edhe irritabiliteti duke çuar në ulje të pragut të ngacmueshmërisë dhe duke gjeneruar konflikte ekstreme”, shpjegon psikiatria për ABC.

Ndërsa për personat të cilët vuajnë nga probleme të shëndetit mendor, psikiatrja Rreli thotë se mjekimet që marrin bëjnë të mundur që temperaturat e larta të mos ndikojnë në përkeqësimin e gjendjes së tyre.

“Personat që janë diagnostikuar përgjithësisht nuk ka shumë ndikim sepse një person qe e ka identifikuar problematikën e vet përpiqet që të marrë masa që kjo problematikë të mos agravojë më tepër”.

Ajo këshillon shmangien e daljes gjatë orëve të pikut të vapës dhe të konsumojnë në mënyrë të vazhdueshme lëngje dhe ujë.