Avokati Spartak Ngjela ka komentuar lidhur me sigurinë në Shqipëri, duke iu referuar ngjarjeve të ditëve të fundit ku për pasojë ka patur humbje në jetë njerëzish.

Në një intervistë për Euronews, Ngjela kritikoi Policinë e Shtetit, pasi sipas nuk ka asnjë lidhje me funksionin kryesor që është parandalimi i krimit dhe se siguria nuk është në nivelin e duhur.  

“Nuk është gabim të thuhet se siguria në Shqipëri nuk është në nivelin e duhur. Kjo polici nuk ka lidhje me parandalimin e krimit, por kjo polici është një polici, e cila vjen pas krimit. Pasi ka ndodhur krimi kjo ka vlerë e vet në kapjen e krimit”, tha ai.

Ngjela tha se kriminaliteti në Shqipëri është në nivele alarmante për shkak se sistemi gjyqësor dhe politika i kanë dhënë pushtet krimit.

“Kriminaliteti në Shqipëri është në këtë nivel, sepse niveli i korrupsionit në nivelin gjyqësor i ka dhënë pushtet krimit. Korrupsioni në rangun gjyqësor ka lejuar krimin në rangun e qeverisë, korrupsioni në rangun e qeverisë i ka dhënë forcë krimit të rrugës dhe krimit të organizuar”, tha ai.

Sa i takon ngjarjes së Velipojës ku humbën jetën katër persona pas sherrit për hapësirën e vendosjes së shezlongëve, z. Ngjela thotë se ky akt duhet cilësuar si krim ekonomik.

“Krimi i rrugës sot përfiton nga të drejtat e njeriut. Policia nuk ka të drejtë të kontrollojë çdo individ, sepse nuk ta lejon ligji. Krimi që keni parë ju në Velipojë është krim i organizuar, është krim ekonomik”, theksoi ai.