Historiani Kastriot Dervishi ka nxjerrë një procesverbal që i takon viteve 1940, në të cilin shprehet se Enver Hoxha shiste mish derri të prishur dhe djath me erë të keqe.

Në një postimi në rrjetin social Facebook, Dervishi shprehet se në datën 7 gusht 1940 polici i Bashkisë së Tiranës në orën 17:00 të pasdites, pasi ushtroi kontroll në dyqanin e ish diktatorit, konstatoi 3 këmbë derri të prishura me krimba të ekspozuara për shitje dhe 2 kuti djathi të firmës “Bell pauese”, me erë të keqe.

Sipas tij, në atë kohë polici e dënoi me 5 franga Enver Hoxhën, ndërsa shton se ky i fundit nuk ka nënshkruar procesverbalin, por gjoba është paguar

“1940/Enver Hoxha shiste mish derri të prishur dhe djath me erë të keqe

Është përmendur shpesh se në dyqanin “Flora” (të marrë me qira nga familja Bakiu) shoku Enver shiste cigare dhe bënte “aktivitet revolucionar”. Në fakt dyqani ishte si ato të fshatit të kohës së mëvonshme, i shumëllojshëm në mallra.

Polic Sejfiu i Bashkisë së Tiranë, e nuhati këtë gjë. Në orën 17.00 të ditës së mërkurë, të datës 7.8.1940, pasi kontrolloi i vuri gjobë 5 franga shtetasit Enver Hoxha, me profesion “shitës gjanash ushqimore” sepse në dyqan iu gjetën 3 këmbë derri të prishura me krimba të ekspozuara për shitje dhe 2 kuti djathi të firmës “Bell pauese”, me erë të keqe. Gjoba është nënshkruar edhe nga inspektori komandant i policisë. I gjobituri nuk ka nënshkruar, por gjoba është paguar”, shkruan Dervishi.