Ç’kuptim kanë ngjyrat në ëndërr? Të fshehtat që qëndrojnë pas tyre

Përpos objekteve, dhe ngjyrat që shikojmë në ëndërr kanë një kuptim specifik. Duke ditur simbolikën e secilës ngjyrë, mund të përcaktojmë më mirë domethënien e një ëndrre. Për të folur mbi këtë temë, ishte e ftuar në emisionin “Abc-ja e mëngjesit” Bela Mero, e cila shpjegoi për moderatorin Alban Musa të fshehtat që qëndrojnë pas tyre.

E kuqja – Si në jetën e përditshme që përfaqëson pasionin dhe në ëndërr ka domethënie të forta. Përveç dashurisë, ka raste kur nuk lë shije të mirë, kthehet në të kundërtën për shembull lufton pasionin apo përfaqëson zemërim, urrejtje dhe negativitet.

Blu – Është një ngjyrë që përfaqëson të mbarën dhe një thellësi të mendimeve tona. Nëse diçka është blu e theksuar ne mund të marrim një mesazh të pastër besnikërie.

Jeshilja – Lidhet me Venusin, është ngjyrë pozitive që lidhet me gjallërimin dhe ripërtëritjen, me ndjeshmërinë dhe natyrën. Në përgjithësi nuk jep mesazhe negative, është gjithmonë e mirë.

E verdha – Lidhet me rrezet e diellit dhe ngrohtësinë që lëshojnë si dhe ndriçimin. Përfaqëson përsosmërinë, njihet gjithashtu dhe si ngjyra e intelektit. Është një ngjyrë e mbarë, lidhet me besimin por ka dhe raste kur e verdha e zbehtë nuk është fort e mirë.

E bardha – Si gjithmonë lidhet me pastërtinë, virgjërinë, pafajësinë dhe në ëndërr ka të njëjtin mesazh. Thekson pastërtinë që duhet të gjejmë brenda nesh. Nëse e bardha është më e fortë se sa duhet në ëndërr, duhet të kemi kujdes sepse është simbol i infertilitetit apo një ftohtësie që na pret në një marrëdhënie.

E zeza – Është ngjyra e elegancës, misterit dhe këtë intrigë që mbart si ngjyrë e përcjell dhe në ëndërr. Lidhet dhe me zinë dhe ceremoninë mortore, diçka jo e mirë na pret dhe duhet të jemi të përgatitur për një lajm të keq që mund të marrim.

Kafja – Është një nga ato ngjyra që lidhet me Tokën. me themelet dhe fortësinë e njeriut. Nëse e shohim këtë ngjyrë kemi një ndjesi për t’u kthyer tek vlerat e së kaluarës. Lidhet gjithashtu dhe me ngrohtësinë e nënës.

Portokalli – Është një ekuilibër perfekt mes së kuqes dhe të verdhës dhe si një e mesme e këtyre të dyjave ka një mesazh pozitiv, të energjisë, freskisë rinore dhe lidhet gjithashtu dhe me kreativitetin. Kur është e ndritshme na fton të zbulojmë diçka, kur është e zbehtë tregon një pabesi që na pret ndaj së cilës duhet të tregohemi vigjilent.

E purpurt – Lidhet me ndershmërinë dhe mençurinë. Nëse duam të zgjojmë një pjesë tonën të vëmendjes ndaj mençurisë kjo ngjyrë është një sinjal i mrekullueshëm në ëndërr. Është gjithashtu karakteristikë e modestisë. /abcnews.al