Kryeministri Edi Rama

Kryeministri Edi Rama e nisi ditën me një postim në rrjetet sociale për Velipojën, aty ku disa orë më parë ndodhi një ngjarje e rëndë, ku mbetën të vrarë katër persona dhe u plagosën dy të tjerë.

Rama postoi një foto nga plazhi i Velipojës, krahas së cilës shkruante: Mirëmëngjes nga Velipoja e dashur.

Por kryeministri e fshiu postimin, pasi pati reagime të shumta, ku i kujtonin ngjarjen e rëndë. Pasi e fshiu foton ai ka publikuar një video për shërbimet e reja në spitalin Universitar “Shefqet Ndroqi”.

U konfliktuan për shezlongët/ Katër të vrarë dhe dy të plagosur në Velipojë, mes tyre një 20-vjeçar; detaje mbi ngjarjen

Foto ilustruese

Një ngjarje e rëndë ka ndodhur pak pas mesantës në Velipojë. Për pasojë kanë humbur jetën katër persona dhe kanë mbetur të plagosur dy të tjerë.

Konflikti i armatosur ka ndodhur mes pronarëve të dy hoteleve që ndodheshin afër njëri-tjetrit. Palët dyshohet se  u konfliktuan për shezlonget pasditen e djeshme. 

Viktimat janë Kujtim Ferracaku, dhe 2 anëtare të familjes Gocaj, Xhovani Gocaj, Edmond Gocaj. I pajetë ka mbetur edhe Myzerim Zeneli punonjësi i shezlongëve, 20-vjeç.

Kujtim Ferracaku është babai i Arjan Ferracakut, i cili është vrarë në një atentat të ndodhur ne vitin 2018. Ndërsa të plagosurit janë Hasan Ferracaku, vëllai i Kujtim Ferracakut dhe Elmedin Dyli.

Pas ngjarjes së reëndë forca të shumta policie kanë blinduar dje Velipojën. Drejtori i Policisë së Shkodrës Niko Brahimaj përmes një prononcimi për mediat dha detaje lidhur me këtë ngjarje.

Ai tha se në konflikt është përdorur më shumë se një armë dhe se policia ka sekuestruar kamerat e sigurisë për të zbardhur dhe vënë para drejtësisë autorët. Brahimaj ka theksuar se konflikti ishte për motive të dobëta dhe ndodhi para hotel “Gocaj”.

“Rreth orë 00.30 minuta në Velipojë ka ndodhur një ngjarje tepër e rëndë kriminale. Ngjarja ka ndodhur në ambientet të  jashtëm të hotel Gocaj, ku për shkak të konflikti me armë të çastit dhe për motive të dobëta. Motive të dobëta, duhet të them për shkak të ndarjes së pronësisë mbi ambientet ose mbi sipërfaqet e rërës që shfrytëzohen për vendosjen e çadrave dhe shezlongëve.

Si rezultat ka gjetur vdekjen Kujtim Ferracaku, 59 vjeç, dhe 2 anëtare të familje Gocaj, Xhovani Gocaj 25-vjeç, Edmond Gocaj 38 vjeç. I vdekur ka mbetur edhe Myzerim Zeneli 20 -vjeç punonjësi i shezlongëve, vetëm 20 vjeç. I plagosur në ngjarjen e rëndë ka mbetur Hasan Ferracaku 54-vjeç, si dhe Elmilind Dyli 17-vjeç.

Policia ka marrë masa dhe ka mbërritur në vendngjarje. Në ngjarje janë përfshirë më shumë se sa një armë. Një pistoletë është sekuestruar. Janë sekuestruar një numër kamerash sigurie. Shumë shpejt do të ketë persona të arrestuar”, tha Brahimaj.