Cristiano Ronaldo në sfidën ndaj Hungarisë u bë lojtari i parë që ka luajtur në pesë kampionate europiane. Sulmuesi i Juventusit ka përfaqësuar vendin e tij në çdo Europian që kur Portugalia organizoi turneun në vitin 2004, 17 vjet më parë.

Ronaldo gjithashtu do të shpresojë të shtojë një rekord tjetër në koleksionin e tij individual: synon të bëhet golashënuesi më i mirë në historinë e Kampionatit Europianit.

Ish-sulmuesi i Manchester United dhe Real Madridit e nisi rrugëtimin në këtë kompeticion në vitin 2004, por shpresat për ta ngritur trofenë në vendlindje u shuan në finale, pasi Portugalia u shtang nga Greqia, me adoleshentin e atëhershëm Ronaldo që nuk i përmbajti dot lotët e hidhërimit.

CR7 shpresoi të bënte më shumë katër vjet më vonë, në Austri dhe Zvicër, por Portugalia, pasi kryesoi grupin, u mund nga Gjermania në çerekfinale.

Në vitin 2012, Ronaldo ishte frymëzues i Portugalisë deri në gjysmëfinale, ku u eliminua nga Spanja pas goditjes së 11-metërshave (4-2), me Ronaldon që nuk iu dha mundësia ta ezkekutonte penalltinë në serinë e pestë.

Suksesi i shumëpritur erdhi në “Francë 2016”, ku Portugalia, pas një fillimi të ngadaltë (barazoi të tria ndeshjet në grupe) shkoi deri në finale dhe mundi vendin organizator më në Paris. Ronaldo u detyrua të dilte nga loja i dëmtuar, por me pasion e udhëzoi ekipin e tij pranë vijës anësore, derisa Eder shënoi në kohën shtesë golin e fitores, që i dha trofenë Portugalisë.

Ronaldo, fitues i pesë “Topave të Artë”, mund të shkruajë historinë, pasi aktualisht është në kuotën e 9 golave në Europian, aq sa ka shënuar edhe Platini.

Ai gjithashtu ka realizuar 104 gola në 175 ndeshje për Portugalinë, pesë më pak se rekordi i të gjitha kohërave, shënuar nga iraniani Ali Daei.