Debate të një ‘planeti’ tjetër: Kryeministrja Sanna Marin nën akuzë sepse ka shpenzuar më shumë se ç’duhet pará të buxhetit për vaktin e mëngjesit

Kryeministrja finlandeze, Sanna Marin, është vënë në “shënjestër” ditë e fundit, pasi mediat vendase raportuan se ajo kishte shpenzuar më shumë për ushqimin sesa parashikohet në listën e shpenzimeve që mbulon buxheti.

E përditshmja finlandeze “Iltalehti” zbuloi se Marin kishte shpenzuar për ushqimin e mëngjesit 850 € në muaj, gati tre herë më shumë se 300 € në muaj që sipas gazetës është pagesa e parashikuar.

Shkrimi ngriti pikëpyetjen nëse kryeministres duhet t’i paguhet ushqimi me paratë e shtetit.

Kryeministria reagoi me një njoftim për shtyp në të cilin thuhej se nga janari 2020 deri në maj 2021, kostoja e përdorimit të shërbimeve të hotelierisë nga Marin, kur jetonte në një rezidencë zyrtare ishte 14 363,20 €, ose mesatarisht 845 € në muaj.

Vetë Marin i tha transmetuesit YLE se thjesht kishte ndjekur rregullat që kishte gjetur në zbatim kur ka marrë detyrën, por nëse është nevoja, rregulloret do të përmirësohen.

Edhe policia e Helsinkit u bë pjesë e këtij debati, duke deklaruar se do të nisë një hetime për të vlerësuar nëse kryeministrja në bërë shkelje.

E gjetur në këtë situatë, Marin ka nxituar të japë sqarime dhe lidhur me dasmën e saj vitin e kaluar. “Shpenzimet e dasmës I kam hequr vetë”, njoftoi ajo në Tuiter.

Si edhe në vende të tjera të Europës, skandale të kësaj natyre u kanë kushtuar detyrën zyrtarëve të përfshirë në to. Vitin e kaluar, ministrja e Financave, Katri Kulmuni, u largua për shpenzim të parave publike në një trajnim mediatik.