Të hënën që vjen nis prishja e ndërtimeve pa leje. Lajmin e bëri të ditur kryeministri Edi Rama, nga Shëngjini ku ishte në një aktivitet.

Rama paralajmëroi të gjithë ata që kanë ndërtuar pa leje t’i prishin vetë para se të nisë aksioni. Kryeministri iu ka kujtuar penalitetet e Kodit Penal, jo vetëm ndërtuesëve, por edhe inxhinierëve dhe punëtorëve.

Sipas Ramës, askush nuk do t’i shpëtojë përgjegjësisë. Sa i përket pastrimit të inerteve, që duhet ta bëjnë personat që kanë ndërtar, Rama tha se kush nuk e përmbush këtë detyrim, do ta paguajë rëndë.

“Të lexojnë kodin penal, të marrin masa tani, sepse nga e hëna do të jetë vonë për t’ju shmangur përballje deri në fund me ligjin. Të lexojnë kodin penal se çfarë i pret në momentin kur konstatohet flagranca dhe në momentin kur duhet të ballafaqohen. Të fillojnë ti prishin vetë, kjo është për t’ju lehtësuar atë që pason.

Unë dua ta bëj të qartë për të gjithë, nga inxhinieri deri tek punëtori më i fundit, me kodin e ri penal janë pjesë e zinxhirit të fajësisë. Nuk mund të thuash që unë jam punëtor dhe më morën nuk di ca bëj, sepse është njësoj të thuash që unë jam punuar, më morën për të transportuar miell, por kishte kokainë.

Unë i jap sot një mesazh të gjithë cënuesve të  kësaj pasurie. Tërhiquni tani, përfitoni nga këto ditë për të hequr tani ato që keni bërë. Ligji detyron ata që ndërtojnë pa leje edhe të pastrojnë. Kjo gjë shpesh herë është lënë pas dore. Ne nuk do ti lëmë grumbullimet, por kush nuk do ti pastrojë vetë do të paguajë rëndë”, tha Rama.