Edit Harxhi, kandidate për kryetare të Partisë Demokratike, ka qenë e ftuar në emisionin “Të Paekspozuarit” nga Ylli Rakipi në MCN TV, ku foli për zgjedhjet që do të mbahen në parti dhe situatën me anëtarësinë e partisë.

Harxhi tha se procesi zgjedhor është i pabarabartë, megjithatë ajo do të kandidojë dhe beson se ka shanse të fitojë, për shkak të zemëratës së anëtarësisë me lidershipin aktual dhe entuziasmin për ndryshim.

Edit Harxhi: Po hyj në garë, jo për të legjitimuar Bashën, por kërkoj që PD të rikthejë vlerat e saj morale. Guxoj të hyj në këtë garë, pavarësisht terrenit të vështirë. Guxoj të hyj në një garë, për të treguar se kanë mbetur njerëz që duan ta rikthejnë partinë në ato vlera që ka patur kjo parti.

Nuk është fasadë për mua. Dua të kem një fitore morale nga kjo. Gara është e pabarabartë, jo transparente. Pavarësisht cfarë ndodh nga kjo garë, apo rezultatit të kësaj farse, sërish Basha do të dalë shumë më i humbur se gjithë ne të tjerët.

Janë katër kandidatë, ju nuk e dini se si vlon anëtarësia. Para dy ditësh kam hapur facebook, të shihni se cfarë ndodh, është e pabesueshme. Mbështetja e anëtarësisë, të shihni zemëratën e anëtarësisë së PD-së. Vijnë mesazhë nga Saranda në Tropojë, nga Korça në Shkodër. Pse? Sepse kam dalë me idenë që duhet të kemi një vizion të ri. Duhet të ngrihet mbi vlerat dhe idealet e 90’. Përkrahja është e jashtëzakonshme. Procesi është farsë.

Artur Zheji: Nëse procesi është farsë, ju jeni lojtare serioze. Nuk mund të hyni. Hyn për të luajtur, apo jo?

Edit Harxhi: Për të luajtur dhe për të fituar. Për të fituar lojën dhe betejën. Ajo është farsë, për shkak të rregullave të pabarabarta. Morali im më lejon të hyj në këtë garë. Nuk ka asgjë të ma pengojë këtë moral, për të hyrë në këtë garë edhe pse është e pabarabartë, jo transparente.