Agron Shehaj ishte surpriza e procesit të zgjedhjeve brenda PD.

Disa orë para përfundimit të afatit për dorëzimin e kandidaturave për kreun e PD, njofton se do hyjë në garë edhe deputeti fitues i PD, Agron Shehaj.

Lajmin e bëri të ditur përmes një postimi në rrjetet sociale, ku shkruan se Shqipëria ka sot nevojë për opozitë të fortë me vizion dhe drejtim të ri.

Shehaj thekson se konkurrimin nuk e sheh si garë për post, por si një përpjekje të përbashkët me të gjithë demokratët që dëshirojnë që PD të jetë partia e anëtarëve: një parti e vërtetë demokratike, moderne dhe e hapur.

Shehaj ishte përfolur dhe aluduar edhe më herët si kandidat për të marrë postin e kreut të PD, sidomos pas humbjes së zgjedhjeve të 25 prillit.

Kjo pasi Shehaj ishte ndër kandidatët e PD më të votuar pas Lulzim Bashës. Ai arriti të marrë rreth 14 mijë vota preferenciale në qarkun e Tiranës, përballë 16 mijë që mori kryetari aktual.

Po ashtu, Shehaj në një postim në 30 prill doli kundër Lulzim Bashës, ndërsa ky i fundit fliste për masakër elektorale.

Shehaj në një reagim në rrjetet sociale pranonte rezultatin dhe deklaronte se opozita duhet të hynte në parlamentin e ardhshëm në shtator.  

“Si çdo demokrat do dëshiroja që sot të kishim marrë mundësinë për të venë në jetë angazhimet që morëm para gjithë shqiptarëve për t’u dhënë atyre një qeveri të përgjegjshme që punon për njerëzit.

Por vota juaj për Partinë Demokratike nuk është e humbur, ajo do të përfaqësohet besnikërisht dhe me kurajo në Kuvendin e Shqipërisë, që mbi të gjitha u takon shqiptarëve të thjeshtë.

U jam gjithashtu mirënjohës dhe ndihem përgjegjës ndaj të gjithë juve që shprehët besim tek unë personalisht. Do ta tregoj me punë, çdo ditë, se jam në politikë për ju dhe për t’i shërbyer me nder interesit publik”, shkruante Shehaj.

Po ashtu, ai ka denoncuar i pari edhe skandalin DH Albania, një ndër çështjet korruptive të profilit të lartë në Shqipëri, që u përcoll drejt Gjykatës me rezultate minimale, ndërkohë që kjo e fundit e vlerësoi të drejtë konkluzionin e organit të akuzës.

Veç Shehajt dhe Bashës, në PD kanë dorëzuar kandidaturat edhe Fatbardh Kadilli, Ibsen Elezi dhe Edith Harxhi, ndërsa Lisander Hoxha u tërhoq në minutat e fundit.