Kritike
Kush e përdor fjalën “malok” t’i vijë turp!
Nga Adriatik Lapaj
Po ore po, ka malësor ky vend. Ka malësor në veri dhe në jug. Ka malësor në Kukës, po ka dhe në Vlorë, Gjirokastër, Përmet e Korçë.
Malokët në kuptimin e zi që i jepet ekzistojnë, por janë aty me kostum në zyrat e shtetit duke vjedhur, kërkuar favore seksuale e duke i nxjerrë ujë të zi vendit. Janë mes nesh, gjenden në lokalet e shtrenjta të Tiranës, madje kanë apartament përveç Tiranës edhe në resortet buzë detit Adriatik dhe Jon.
Janë malok nga fushat, nga kodrat dhe malet…janë nga jugu, Shqipëria e mesme dhe veriu, janë multizonal, por i bashkon zemra prej guri, e kanë aq pa jetë e pa ndjenja si guri. Janë makut e servil. Shpesh vijnë erë parfum të blerë me para ilaçesh të vjedhura…
Ndërsa ata të tjerët që banojnë mes lartësive, malësorët krenar…sa herë ka krisur pushka për vatan, kanë zbritur nga lartësitë e i kanë dalë krahë atyre të fushave.
