Aktualitet
Gazetari i Ora News sulmohet nga mbështetës të Erion Veliajt në Kavajë
Gazetari i Ora News, Ronaldo Sharka, është dhunuar së bashku me kameramanin dhe shoferin e televizionit në një takim elektoral të kryetari të bashkisë Tiranë, Erion Veliaj.
Televizioni ka trasmetuar disa pamje ku gazetari përpiqet t’i drejtoj pyetje z. Veliaj, ndërkohë që rrethohet mes protestave nga një grup i madh militantësh.
Në një moment, është e qartë që grupi kërkon ta ndalojë gazetarin të bëjë punën e tij, duke e shtyrë në drejtim të kundërt nga ku po shkonte kryebashkiaku.
“Unë dhe kolegët e gjejmë veten mes një turme, kryesisht meshkuj, që na shajnë, na kërcënojnë dhe na dhunojnë,” tha Sharka.
Ai tha se ka qënë i pajisur me bexhë, mikrofon e logo, duke qënë lehtësisht i identifikueshëm.
Gazetari akuzoi Veliaj se ka qëndruar indiferent ndaj sulmit dhe u bëri thirrje autoriteteve për të identifikuar sulmuesit.
