Rapsodi Gëzim Ahmetaj i ka kushtuar një këngë presidentit Ilir Meta dhe kënga ka dalë në treg një ditë pas përplasjeve të kreut të shtetit me policinë në zyrat e FRD-së në Tiranë.

Kënga e titulluar “Jet te gjat o Ilir Meta” ka marrë mijëra klikime në youtube brenda pak orësh. Megjithëse kreu i shtetit është nga Skrapari, kënga e krijuar për Metën është më ritme nga veriu i vendit.  

‘Qysh prej kohës Gjergj Kastriotit, burr më të fortë nuk ka pas Kombi, në Shqiptari për sa të jetë jeta, gjithmonë të paçim o Ilir Meta. Kryefjalë i Shqiptarisë, themelues i LSI-së ke shkuar në majat e politikës, president i Republikës.’- është një pjesë nga teksti i këngës.

Rapsodi shpjegon se kënga e titulluar “Jetë të gjatë o Ilir Meta“, nuk ka lidhje me ngjarjen ku presidenti u përplas fizikisht me policinë në zyrat e FRD-së në kryeqytet, edhe pse kënga doli një ditë më pas.

 “Është bërë përpara, kjo është e vërteta, nuk mund të gënjej”. Apo ishte me rastin e 2 marsit, një vit nga mitingu i vitit të kaluar? “Edhe nga kjo, vjet isha në tubim. Kurrë nuk kam njohje me Ilir Metën, por arsyeja kjo ishte” tha ai.

I pyetur nëse a i ka ardhur ndonjë mesazh nga Presidenti, Ahmetaj shprehet: “Jo, jo, as nuk i pres ato punë”.

Gëzim Ahmetaj i ka thurur këngë edhe Sali Berishës e Azem Hajdarit, por cfarë të përbashkëte kanë tre personazhet që Rapsodi zgjodhi për t’u kënduar? “Të tre janë atdhetarë” thotë ai.

Po kënga e radhës për cilin do të jetë, Rama, Basha apo Kryemadhi?

“Jo, jo, asnjëri, më këta të tjerët nuk kam punë me asnjë”. As Basha s’i plotëson kushtet për këngë? “Jo, jo, as për këngë, për mua nuk është lider, nuk harxhoj kohë me këta të tjerët”. As Rama? “Mos more burrë”. Po Kryemadhi? “Nuk u këndoj grave unë, burrave” shprehet Ahmetaj

Keni ndonjë mesazh për zgjedhjet? “Ishalla fiton opozita në 25 prill, kjo është kryesorja”.

Ju keni simpati për Presidentin, do ta bënte më mirë po të ishte në krye të opozitës? “Oh, si nuk e bën, shumë më mirë” përfundon ai.