Loja shpërblyese “Giveway” është bërë një fenomen shumë i përhapur në vendin tonë në rrjetet sociale, ku biznese të ndryshme apo personazhe publik shpenzojnë para për të rritur ndjekësit në Instagram.

Manisë për t’i rritur “followersat” në Instagram nuk i ka shpëtuar as deputeti i PS-së për Qarkun e Vlorës, Damian Gjiknuri dhe kjo vihet re te “giveway” i organizuar nga aktorja e humorit Eliona Pitarka. Ajo ka bashkëpunuar me 56 faqe në Instagram dhe një prej tyre është dhe faqja e deputetit socialist. 

Për ata që marrin pjesë në lojën shpërblyese, rregulli e përcakton se duhet të ndjekin dhe faqet që ndjek Pitarka dhe sipas rregullave, Gjiknuri duhet të ketë paguar aktoren për këtë rast reklamimi, por nuk dihet shuma.

Çmimet shpërblyese për fituesit janë 100, 200 dhe 300 euro kesh dhe një bonus prej 500 eurosh, por Eliona njofton se kjo është vetëm faza e parë e “giveway-it”.

Kreu i fushatës së PS-së në Vlorë duket se e ka nuhatur suksesin e rrjeteve sociale dhe ka dashur që Instagrami i tij të shërbejë si një mjet për të rritur votat, sidomos në këtë kohë pandemie ku grumbullimet masive në terren janë të ndaluara.