Kryesore
Rikthimi i Donald Trump, ish-presidenti le të hapur mundësinë e rikandidimit në 2024
Ish-presidenti amerikan, Donald Trump tha se nuk ka në plan të themelojë një parti të re politike, duke thënë në fjalimin e tij të rikthimit, se kjo do të ndajë votën e Republikanëve.
Në fjalimin e tij të parë që kur Joe Biden u bë president, ai gjithashtu la të kuptohej se ai mund të kandidonte përsëri për këtë post në 2024.
Trump kritikoi ashpër pasardhësin e tij, duke thënë se politika e SHBA kishte shkuar nga ” Amerika në plan të parë, në Amerika në plan të fundit”.
Fjalimi vjen disa javë pasi Trump u shpall i pafajshëm në gjyqin e fajësimit të senatit. Paraqitja e tij në Konferencën e Veprimit Politik Konservator (CPAC) në Orlando të dielën ishte tregues i ndikimit të tij të vazhdueshëm mbi Partinë Republikane.
Ish presidenti mbetet i bllokuar nga platformat e mediave sociale, përfshirë Facebook dhe Twitter, për përgjigjen e tij ndaj trazirave vdekjeprurëse të janarit në Kapitolin e SHBA.
Ish-presidenti 74-vjeçar u brohorit nga mbështetësit kur u shfaq në skenë në Hyatt Regency Hotel me më shumë se një orë vonesë. Shumë njerëz në turmë nuk kishin vendosur maska.
“Unë qëndroj para jush sot për të deklaruar se udhëtimi i pabesueshëm që kemi filluar së bashku katër vjet më parë nuk ka mbaruar. Ne jemi mbledhur këtë pasdite për të folur për të ardhmen – të ardhmen e lëvizjes sonë, të ardhmen e partisë tonë dhe të ardhmen e vendit tonë të dashur”, tha ai.
Ai hodhi poshtë çdo ide se ai mund të fillonte një parti të re politike – duke përshkruar thashethemet që ai do ta bënte këtë si “lajme të rreme”.
“A nuk do të ishte e shkëlqyer? Le të fillojmë një parti të re në mënyrë që të ndajmë votën tonë dhe të mos fitojmë kurrë,” ironizoi Trump.
Pavarësisht humbjes së zgjedhjeve presidenciale të nëntorit dhe kritikimit të thellë gjatë trazirave të janarit, raportet sugjerojnë se Trump mbetet jashtëzakonisht i popullarizuar në mesin e bazës së tij të votimit.
Javën e kaluar një sondazh i SHBA sugjeroi që 46% e votuesve të anketuar të Trump do të votonin për të nëse ai do të linte Republikanët dhe të fillonte partinë e tij.
