Prisja ta martoja, jo ta çoja në arkivol

Përcillet për në banesën e fundit Klodian Rasha, përlot i ati: Shteti të të vrase në derën e shtëpisë?! Prisja ta martoja, jo ta çoja në arkivol

Në foto: Babai i Klodian Rashës

Familjarë dhe miq janë duke përcjellë sot për në banesën e fundit 25-vjeçarin, Klodian Rasha, i cili humbi jetën ditën e djeshme, pasi u qëllua me armë zjarri nga një efektiv policie.

Në një intervistë për News 24, i ati i Klodianit, kërkon drejtësi për vrasjen e 25-vjeçarit. Ai tregon me ngashërim dhimbjen që i ka shkaktuar humbja e të birit, duke thënë se në atë moshë priste për ta martuar dhe jo ta fuste në dhe.

“Kjo është një nga momentet më të vështira. Dhimbja ime është edhe e juaja. Dhimbja ime është e mbarë popullit shqiptar. Dhimbja ime është e çdo nëne e çdo babe, është e çdo llojë kombi, e çdo race. Dhimbja ime është për të gjithë. Lind dhe rritet dhe të jep dhe të merr Zoti.

Apeli është që drejtësia të bëjë drejtësi. Mos të na vrasi çdo minutë. Mos të na vrasi përditë, sepse ne jemi ata që i shërbejnë shtetit, mundohemi për shtetin, kërkojmë drejtësi ndaj shtetit, kërkojmë ndihmë nga shteti. Jo të më vijë djali mua në rrugicë, dhe të më vritet tek dera e shtëpisë.

Kjo është jashtë çdo llojë norme. Kush mund ta bëjë këtë?! Çfarë polici mund të jetë ai që të vret në derë të shtëpisë?!

Nuk mund të shprehem më tej. Fatkeqësinë time mos e provoftë askush. Këtë llojë gjendje mos e provoftë askush, asnjë llojë shteti dhe asnjë llojë kombi. Sepse të kesh frikë nga shteti… Punonjësi i policisë është aty për të na mbrojtur, jo… Djali ishte duke punuar në llaç gjithë ditën në shtëpi, kisha një usta aty po bënim suvatime. Doli natën për të blerë një paketë cigare sepse skishte maskë. Polici i shtinë nga mbrapa në kokë, duke e vrarë. Një fëmijë 25 vjeç. Çfarë të të them tjetër, mos më pyesni më më tej.

Urojë që kjo fatkeqësi të mos i ndodhë askujt. Uroj që gjithë rinia të lulëzojë dhe të rritet si lule dhe ta gëzojë jetën në moshën 25-vjeçare që unë pres për ta martuar dhe jo ta çoja në arkivol. Kjo është e papërballuëshme”, tha babai i viktimës.