Kryebashkiaku Erion Veliaj ka komentuar të martën deklaratën e presidentit Meta se të gjithë gazetarët e kërcënuar, si Beti Njuma, duhet të mblidhen dhe të hapin një media të re.

Në një postim në Twitter, Veliaj ka postuar një foto nga video-përgjimi i Metës me ish-ministrin Dritan Prifti dhe ka shkruar:

“Lajm i mirë që Ilir Meta ka marrë iniciativën për një media të re transparente dhe kritike me pushtetin. Ai ka jo vetëm lekët por dhe historinë e tij të 7 për qindshit, që mund ta mbajë gjallë këtë medie si me para ashtu dhe me permbajtje gjithë jetën! Suksese!”

Reagimit të Veliajt i është përgjigjur në Facebook, zëdhënësi i presidentit Tedi Blushi, i cili shkroi:

“Gjynah që Lali Fiku nuk vlen më as si gjethe Fiku për ‘tërmetet’ e Bablokut!”

Deklarata e presidentit Meta erdhi në solidarizim me gazetarën Beti Njuma, e cila siç ka dalë nga mesazhet e publikuara nga pronari i Ora News-it Ylli Ndroqi, është ofenduar rëndë nga Veliaj.

Këshilli Shqiptar i Medias i ka bërë thirrje publike Veliajt që të vërtetojë që ai nuk i ka shkruar ato mesazhe ose të kërkojë falje publike.

Veliaj, deri më tani nuk ka bërë asnjë deklarim publik për këtë ngjarje.