O humoristi plot kripë e moralisti pa karar, Kobe Bryant, ishte idhulli, i çdo futbollisti apo sportisti tjetër të madh, që ju mund të keni idhull.

Nga Briken Fejzullai

Që të kuptoni se sa i madh ishte Kobe, përpara se të bëni batuta patetike mbi hidhërimin e shqiptarëve për “njonin” matanë oqeanit; mjafton të kuptoni që Kobe Bryant, ishte idhulli, i çdo futbollisti apo sportisti tjetër të madh, që ju mund të keni idhull.

Nga Messi, Ronaldo, Totti, Ronaldinho, Pirlo, Maldini, Zanetti, Salah, Mbappe, Neymar; deri te Valentino Rossi, Federer, Nadal, Vettel, Hamilton, Tiger Woods, Lebron James,Tom Brady, Conor McGregor, Hussain Bolt… të gjithë adhuronin literalisht Kobe-n.

Duke filluar nga Trump apo Obama e duke përfunduar tek njeriu më i thjeshtë në planet, nuk ka një njeri të vetëm që e njihte si personazh dhe mund të mos e donte. Ti mund të ishe tifoz i GOAT Michael Jordan (si në rastin tim) por nuk mund të mos e adhuroje atë djaloshin spektakolar dhe elegant në të njëjtën kohë, me buzën vesh më vesh gjithmonë, që të zbardhte netët, për ta parë të shkruante poezi me topin e basketbollit.

Mjafton të shihje, sa herë kthehej plot mall në Itali ku ai kishte kaluar fëmijërinë e tij apo t’i shihje buzëqeshjen dhe durimin për të kënaqur sa më shumë fansa të mundej, kur ata e pushtonin për një “hi 5”, foto a autograf; për të kuptuar ç’kampion ishte edhe në jetë.
IKONË!

Kobe bën pjesë tek ajo kategori sportistësh të rrallë, të cilët ishin legjenda, përpara se të bëheshin të pavdekshëm.
Kampionë si Ayrton Senna, Marco Pantani, Michael Schumacher*… kampionë pa kohë, e pa shtetësi, të cilët i përkasin të gjithëve, në çdo cep të globit.
Edhe ne shqiptarëve, plot halle të tjera.

Kobe Bryant lë një boshllik të madh, në rradhë të parë, si njeri që ka frymëzuar qindra mijëra njerëz e pastaj, si fenomen absolut në sport… ndaj duhet të dish o humoristi plot kripë e moralisti pa karar: që nuk ështe se duhet ta kishim komshi, për të na dhimbur humbja e tij.

Rest In Peace CHAMP