Ish-deputeti Luçiano Boçi akuza të forta Shahinit dhe Ramës/ Zbulon pse u hoq Kosova nga harta

Ministrja e Arsimit Besa Shahini ka reaguar pasi në media u publikua një faqe e librit të Qytetarisë së klasës së 8-të ku në hartë mungonte Kosova.

Shahini shprehet se ky është një gabim i paqëllimshëm por sipas saj nuk do të duhej të ekzistonin pasaktësi të tilla në librat shkollorë

“Lajmi i mirë është se kjo ka ndodhur ndërkohë që po zhvillohet procesi i kontrollit të librave shkollorë, pasi sivjet është mbyllur procesi i hartimit të librave të rinj. Pastaj do të vihet në lëvizje detyrimi për shtëpitë botuese që t’i adresojnë menjëherë me fletë plotësuese gabimet e konstatuara, ndërsa në vijim me redaktim të plotë”, shkruante Shahini.

Por, pas këtij postimi të Shahinit, ka reaguar ish-deputeti i PD-së, Luçiano Boçi.

Në një postim në rrjetet sociale, Boçi shkruan se kjo nuk është aspak rastësi, por një provokim nga ana e Ministrisë së Arsimit.

“Bën sikur heqja nga harta e Kosovës në tekste, është një rastësi e keqe nga ato që asaj i ndodhin shpesh këto muaj drejtimi në Ministri.
Sikur kjo nuk është asgjë, por thjeshtë lapsus hartuesish, ndërkohë, duket që nuk është aspak rastësi.
Por është një provokim i pranueshmërisë së opinionit për projekte perspektive. Kërkon kështu që budallallikun e vet ta përdorë si varkë shpëtimi për çmendurinë e shefit.”-shkruan ndër të tjera Boçi.

Postimi i plotë:

NAIVJA DHE I ÇMENDURI
Teksa bën deklarata qesharake për mungesën e Kosovës në hartat e teksteve shkollore, Shahini përpiqet të dalë para opinionit si naive seriale.
Si Ministrja e Arsimit me origjinë nga Kosova që nuk mund ta pranojë një gjë të tillë dhe s’mund ta lejojë një gjë të tillë, ndërkohë që harta me ulërimën e saj e bëri punën e vet.
Bën sikur heqja nga harta e Kosovës në tekste, është një rastësi e keqe nga ato që asaj i ndodhin shpesh këto muaj drejtimi në Ministri.
Sikur kjo nuk është asgjë, por thjeshtë lapsus hartuesish, ndërkohë, duket që nuk është aspak rastësi.
Por është një provokim i pranueshmërisë së opinionit për projekte perspektive.
Kërkon kështu që budallallikun e vet ta përdorë si varkë shpëtimi për çmendurinë e shefit.
Po pse e rastit është vëllazëria e Ramës me Vuçiç dhe deklaratat e stisura për të fituar pikë në opinion?!
Apo rastësi quhet propaganda e shfrenuar para një viti, që për pak desh na e bëri Skënderbeun me origjinë serbe?!
Mos vallë rastësi konsiderohet Kosova e munguar në publikimin në faqen zyrtare të Ramës?!
Ndoshta rastësi për Besën e Ramën është dhe minishengeni sllav që na shitet si i bekuar nga perëndimi?!
Sa shumë “rastësi” të çmendura që kanë bërë këta.
Por të jenë të bindur që rastësia nuk ka për t’i shpëtuar nga gjykimi i opinionit publik.