Dokumenti: Si votoi Dvorani në gjyqin e 2011 për videon Prifti-Meta

Ditët e fundit në qendër të debateve politike është kaosi i krijuar në Gjykatën Kushtetuese.

Presidenti Ilir Meta ka pasur një përplasje të fortë me Këshillin e Emërimeve në Drejtësi, në lidhje me emërimin e Arta Vorpsit anëtare të Gjykatës Kushtetuese, gjë që ka sjellë një situatë të pazakontë.

Nga ana tjetër në të njëjtin pozicion, presidenti Meta ka dekretuar Marsida Xhaferllarin.

Por, ndërkohë në drejtim të kreut të Këshillit të Emërimeve në Drejtësi, Ardian Dvorani ka pasur një sërë akuzash kryesisht nga presidenti Ilir Meta, por edhe nga ish-kryeministri Sali Berisha.

Qeveria sulmet dhe akuzat ndaj Ardian Dvoranit po tenton t’i devijojë duke argumentuar se Ardian Dvorani është njeriu që ka dashur të dënojë Ilir Metën, në lidhje me akuzat për korrupsion, në rastin e video-përgjimit të publikuar në vitin 2011, nga ish-ministri Dritan Prifti.

Në atë kohë, trupa gjykuese e Gjykatës së Lartë, e kryesuar nga Ardian Dvorani i dha pafajësinë Metës, por Qeveria pretendon se Dvorani ishte i vetmi gjyqtar që kërkonte dënimin e Metës.

Në fakt Ardian Dvorani në çështjen e Ilir Metës ka votuar njëlloj si gjyqtarët e tjerë.

Portali CNA ka pulikuar tre dokumente, trupën gjykuese dhe dokumentet që tregojnë sesi ka votuar dhe çfarë qëndrimi ka mbajtur Ardian Dvorani.

Ashtu si dhe anëtarët e tjerë ka qënë pro që Ilir Meta të dalë i pafajshëm.