Kryeqyteti i Shqipërisë vijon që të jetë një ndër vendet më të ndotura të Europës. Indeksi, i cili përllogaritet nga Numbeo, portali më i madh i të dhënave mbi cilësinë e jetës, tregoi se ndotja në Tiranë është më e lartë në gjashtë mujorin e 2019-s, duke shënuar 83.72 pikë, nga 82.8 që përllogaritej në fillim të këtij viti.
Numbeo vlerëson se për gjashtë mujorin e këtij viti Tirana është kryeqyteti më i ndotur i Europës dhe i treti si qytet, pasi në vend të parë renditet Tetova në Maqedoni dhe Chelyabinsk në Rusi.
Përkeqësimi i nivelit të ndotjes në Tiranë, sjell edhe uljen e cilësisë së jetës për ata që jetojnë apo që po mendojnë të shpërngulen në kryeqytet. Numbeo shërben si baza më e madhe e të dhënave mbi kostot dhe cilësinë e jetës për të huajt që kërkojnë informacion për vendet ku do të udhëtojnë apo do të jetojnë.
Pas Tiranës, kryeqyteti i dytë më i ndotur i Europës është Shkupi. Sipas të dhënave të publikuara nga Numbeo, indeksi i ndotjes në Shkup shënoi 82.6. Por, ndryshe nga Tirana, indeksi i ndotjes në Shkup nuk ka pësuar ndryshime gjatë pjesës së parë të viti.
Sipas renditjes që ka realizuar Numbeo, tek qytetet më të ndotura mbizotërojnë ato të Europës Lindore dhe Juglindore, kryesisht në Rusi, Maqedoni, Bosnje dhe Ukrainë.
Ndër qytetet më të ndotura të vendeve që janë anëtare të Bashkimit Europian renditet Napoli, i cili është në vend të gjashtë, ndërsa Bukureshti i Rumanisë renditet në vendin e 9.
Qyteti më pak i ndotur i Europës, sipas vlerësimit të Numbeos është Helsinki, kryeqyteti i Finlandës, i cili ka shënuar për 6-mujorin e 2019-s vetëm 12.4 pikë në indeksin e ndotjes.
Qytetet të tjera më pak të ndotura janë Rekjaviku, kryeqyteti i Islandës, Zyrihu në Zvicër, Stokholmi, Malmo dhe Gothenburg në Suedi, Vjena në Austri dhe Kopenhageni në Danimarkë, të cilët kanë shënuar më pak se 20 pikë në indeksin e ndotjes, shkruan ‘monitor’. Në total, janë marrë në shqyrtim 82 qytete të kontinentit Europian.
Indeksi i Numbeo është një përllogaritje e ndotjes së përgjithshme të një qyteti. Pesha më e madhe i është dhënë ndotjes së ajrit dhe më pas ndotja e ujit, si dy ndër faktorët kryesorë. Një peshë më të ulët kanë llojet e tjera të ndotjes.
