“Disa fakte të rëndësishme mbi NATO-n dhe rolin e Shqipërisë”

Shqipëria sot bën dhjetë vjet që është e anëtarësuar në NATO. Kështu ambasada amerikane në Tiranë ka nxjerrë një video me anë të së cilës ndjek disa fakte mbi rolin e vendit në NATO.

“Ndërsa Shqipëria feston 10 vjet anëtarësi në NATO, ne duam të nënvizojmë disa fakte të rëndësishme mbi Aleancën dhe rolin e Shqipërisë brenda saj. #10VjetNATO #NeJemiNATO”, – shkruan ambasada në një postim në Facebook.

Ndërsa në video shkruhet: “Shqipëria udhëheq me dërgimin e trupave ushtarake në operacionet e NATO-s. Aktualisht Shqipëria ka trupa në Kosovë, Bosnje-Hercegovinë, detin Egje, Letoni, Afganistan”.

Anëtarësimi i Shqipërisë në NATO

Shqipëria u anëtarësua në Organizatën e Traktatit të Atlantikut të Veriut NATO në vitin  2009-të. Anëtarësimi erdhi si rrjedhojë e vendimit të rëndësishëm për zgjerimin e Aleancës, të marrë më 3 prill 2008 nga të 26 krerët e Shteteve dhe Qeverive të Aleancës gjatë një seance të posaçme të Samitit të NATO-s Bukuresht, nëpërmjet të cilit Shqipëria dhe Kroacia u ftuan të fillonin bisedimet për anëtarësimin, shkruhet në faqen e Ministrisë së Jashtme.

Më 25 prill 2008 Shqipëria dhe Kroacia nisën zyrtarisht bisedimet për anëtarësimin në NATO. Agjenda e këtyre bisedimeve përfshinte çështje politike, ushtarake, sigurie dhe ligjore që të dy vendet trajtuan me ekspertët e Aleancës.

Nëpërmjet një serie takimesh dypalëshe, midis ekipeve të ekspertëve të NATO-s dhe ekipeve të institucioneve shqiptare u vendos një kalendar me afate kohore për përmbushjen e kritereve dhe reformave të domosdoshme.

U punua për plotësimin e kuadrit të dokumenteve bazë strategjike të rishikuara, si Strategjia Ushtarake, Plani Afatgjatë i Zhvillimit të FARSH 2007-2020, Udhëzimi për Planifikimin Strategjik 2008, etj.

Më 9 korrik 2008, të 26 vendet anëtare të NATO-s nënshkruan gjatë një ceremonie në selinë e NATO-s në Bruksel Protokollet e Anëtarësimit me Shqipërinë dhe Kroacinë për anëtarësimin e tyre.

Shqipëria mori për të parën herë pjesë si anëtare me të drejta të plota e NATO-s në Samitin e Aleancës që u mbajt në Strasbourg/Kehl më 4 prill 2009, ndërkohë që më 7 prill 2009, në selinë e Aleancës në Bruksel, u zhvillua ceremonia zyrtare e ngritjes së flamujve të Shqipërisë dhe Kroacisë në NATO, ndërsa një ditë më vonë Sekretari i Përgjithshëm i Aleancës zhvilloi një vizitë zyrtare në Shqipëri gjatë së cilës atij iu akordua titulli Doctor Honoris Causa nga Universiteti i Tiranës.

Burimi: Ministria për Europën dhe Punët e Jashtme