Ipeshkvi i Dioqezës së Rrëshenit, dom Gjergj Meta ngriti një sërë shqetësimesh të banorëve të zonës që mbulon kjo dioqezë. Ai tha si pasojë e mungesës së infrastrukturës dhe kushteve të jetesës shumë fshatra janë shpopulluar.

“Varfëria e dytë përveç asaj materiale është ndjesia që ndjehen të braktisur. Është pak tragjike pasi ato zona janë të lëna pas dore, mungon infrastruktura, rrugët, fshatrat po braktisen nga njerëzit. Një fshat i bukur atje që deri para 9 vitesh kishte 100 nxënës sot ka vetëm 1 nxënës. Kur shkoj atje për meshë s’kam asnjë person të ri. Fshatrat e verilindjes po zbrazen. 60 për qind e popullsisë në zonën verilindore është larguar”, u shpreh Dom Gjergj Meta teksa ishte i ftuar në programin e Adi Krastës “A Show”.

Po kështu ai foli edhe për Bulqizën. “Zona që unë përfaqësoj është shumë e varfër, pavarësisht se pasuritë nëntokësore janë të mëdha. Ky është një paradoks i frikshëm. Para se të vija në këtë studio mora një mesazh nga një banor i Bulqizës, i cili më tha ta lexoj mesazhin: Ka 70 vjet që nxjerr krom Bulqiza thuaj dhe është vendi më i varfër në Shqipëri”, tha ai.

Dom Gjergji nuk i shpëtoi as pyetjes për situatën politike në vend dhe protestat e opozitës.
“Unë nuk hy në zgjedhjen e tyre. Nga pikëpamja ime një nga mëkatet e politikës, është ndarja e shoqërisë me ne dhe ato. Ne jemi ato të mirët këto janë të këqinjtë. Nuk mendoj që shkon dhe nuk i bën mirë shëndetit të jetës. Përtej asaj që ndodh sot. Ne trashëgojmë rininë tonë në të ardhmen. Ka një përplasje shumë të fortë me urrejtje. Edhe të rinjtë kanë një shpirt antagonist dhe agresiv ndaj të tjetrit. Kjo e dëmton shoqërinë shqiptare nga pikëpamja shoqërore”, tha ai.