Notisi dhe lufta me mullinjtë e erës

Nga Klodian Tomorri

E ka dëgjuar njeri kur Notis ka sharë shqiptarët? Nese po, çfarë ka thënë konkretisht? Kur dhe ku?

Këto ditë është turrur gjysma e Shqipërisë kundër një këngëtari grek.

Janë bërë emisione, kronika dhe shkrime pafund për këtë punë. Por askush nuk thotë se çfarë ka thënë Notis për Shqipërinë dhe shqiptarët.

Nëse ky i ka fyer shqiptarët, zemërimi do ishte i drejtë. Por deri tani shumica e atyre që janë zemëruar nuk e dinë pse janë zemëruar.

Sepse deri tani ska dalë asnjë video apo asnjë deklaratë që të provojë se Notis ka fyer shqiptarët. Vetë këngëtari thotë që nuk e kam thënë kurrë, ndërkohë që boloria vazhdon. Kjo ngjan si çmenduri.

Tani dhe dy gjëra të tjera shkurt:

çmimi i biletës ashtu si çdo çmim tjetër është i lirë dhe rezultat i kërkesë ofertës. Ky dhe ata që e kanë sjellë këtu e shesin biletën sa t’u dojë qejfi. Ashtu si çdokush e shet mallin e tij në treg sa t’i dojë qejfi. Po pse këtyre këngëtarëve tanë ja cakton njeri sa lekë marrin nëpër dasma dhe synetllëqe?

E dyta, bindjet personale. Si mundet një popull, 30 për qind e të cilit është nostalgjik për Enver Hoxhën dhe regjimin komunist më gjakatar të botës (Burimi Berzh 2017), t’i turret një shtetasi të huaj sepse paska bindje të ekstremit të djathtë? Hipokrizi maksimale.

P.S. Nuk jam grek. Jam shqiptar pa asnjë përzierje minoritare.

Nëse ky ka sharë shqiptarët dhe ka thënë se janë rracë inferiore jam plotësisht dakord të shpallet non grata.