Barcelona/ Në vitin 2018, të ardhurat pritet të arrijnë në 900 milionë euro    

Bordi drejtues i klubit të Barcelonës hartoi projektbuxhetin për sezonin 2017/2018, që pritet të miratohet në mbledhjen e aksionerëve.

Sipas buxhetit, bordi i klubit katalan parashikon që bilanci i Barcelonës në vitin 2018 të mbyllet me të ardhura rekord 897 milionë euro. Transferimi i Neymar tek PSG, pas pagesës së klauzolës 222 milionë euro nga francezët, do t’i rrisë të ardhurat e blaugranave thuajse në kuotën 900 milionë euro, duke iu afruar objektivit të synuar nga presidenti i Barçës, Jordi Bartomeu.

“Objektivi ynë është të arrijmë 1 miliard euro në pesë vjet – ishin fjalët e Bartomeut në vitin 2016, duke synuar arritjen e këtij objektivi brenda vitit 2021. – Bëhet fjalë për një projekt ambicioz, jo vetëm për të investuar në futboll dhe në sportet e tjera, por edhe për vendosjen e Barcelonës në një pozicion në botë, ku nuk ka arritur askush tjetër”.

Nëse shifrat e buxhetit do të konfirmoheshin gjatë sezonit 2017/18 do të bëhej fjalë për një rritje pak më shumë se 200 milionë euro.

Viti financiar më 30 qershor 2017 i Barcelonës u mbyll me 708 milionë euro, në rritje me 4,3 për qind krahasuar me 695 milionë euro në sezonin 2015-2016.

Projektbuxheti për 2017/18 do të miratohet në një mbledhje e përgjithshme vjetore të aksionerëve të klubit e cila do të mbahet në fundjavën e 21-22 tetorit në Palau Blaugrana.