Basha, opozitë kryeministrit Edi Rama apo vetëm kryebashiakut Veliaj?  

Beteja e parë politike e Lulzim Bashës, pas humbjes së zgjedhjeve përballë Edi Ramës, ka nisur me sulm frontal kundër kryebashkiakut të Tiranës, Erion Veliaj. Shkak është bërë një projekt-vendim i propozuar nga Bashkia e Tiranës për rritjen e çmimit të ujit. Këshilli Bashkiak pritet të vendos lidhur me këtë propozim, ndërkohë që Basha ka udhëzuar këshilltarët e tij që të votojnë kundër. Basha ka përqafuar këto ditë një tezë populiste, siç janë taksat. Moralisht argumenti i zgjedhur nga PD, duket i saktë. Për shkak se uji dhe paratë e taksave janë një çështje e ndjeshme Basha ka njoftuar edhe nisjen e protestave kundër Bashkisë së Tiranës.

Pas traumës që pësoi Partia Demokratike dhe lidershipi i opozitës me humbjen e zgjedhjeve, Bashës i duhen veprime të forta opozitare. Por nisma e fundit duket më shumë duket si një lëvizje taktike e PD dhe Lulzim Bashës për të dëmtuar Erion Veliajn dhe për të testuar votat dhe qëndrimin e LSI. Si e tillë, kauza opozitare dhe deklaratat e PD për opozitë të egër, në këtë mënyrë siç po nisin lëvizjet, ngrenë jo pak pikëpyetje.

Pikëpyetja e parë lidhet me shënjestrën e zgjedhur për sulm nga opozita. PD dhe Lulzim Basha, si rregull kanë rivalë dhe kundërshtarë politikë Edi Ramën, ministrat dhe qeverinë e PS dhe jo Bashkinë e Tiranës dhe kryetarin e saj. Basha dhe PD do të qëndrojnë edhe 4 vjet të tjera në opozitë për shkak të zgjedhjeve jo shumë të ndershme të 25 qershorit. Kapitulli i kontestimeve dhe problemeve juridikisht ende nuk quhet i mbyllur. Megjithatë, me nisjen e kësaj beteje, Basha ka pranuar pa kontestime humbjen dhe është hedhur në sulm. Çuditërisht sulmi i Bashës dhe PD nuk është ndaj atij që i solli disfatën e turpshme që mbetet Edi Rama, por gjithë bateritë e opozitës po lëshohen kundër Erion Veliajt. Sigurisht Erion Veliaj nuk është i pagabueshëm dhe puna e tij duhet të kalojë në lupën vëzhguese të opozitës. Por koha kur është zgjedhur ky sulm, kur ende nuk janë mbyllur hesapet me zgjedhjet dhe me qëndrimet e PD-së ndaj Edi Ramës, ngrenë jo pak dyshime se pse PD-ja nuk deklaron fort e prerë se nuk e njeh marrëveshjen e 18 majit me kryeministrin.

Si ka mundësi që Basha flet për opozitë të fortë që do të tronditë nga themelet Partinë Socialiste, kur formalisht po bashkëqeverisë me Edi Ramën, pra që ministrat e PD-së rrinë akoma në kabinetin qeveritar? Çudia shtohet më tepër kur në kulmin e bashkëqeverisjes, Rama-Basha, PD-ja nis opozitën ndaj Bashkisë së Tiranës. Natyrisht që ka të drejtë të reagojë, por jo ta kthejë si një qëllim në vetvete.

Duket se sulmet e PD kundër Veliajt bëhen jo pa lejen, në heshtje, të Edi Ramës. Indirekt Kryeministri po i çon sinjale kryetarit të bashkisë, me anë të opozitës. Arsyet e kësaj lëvizje brenda së majtës mund të shpjegohen me qëndrimet që ka mbajtur Erion Veliaj gjatë fushatës elektorale. Kryebashkiaku i Tiranës ishte ndër të paktët drejtues të forumeve të PS-së që ka qenë pro bashkëpunimit mes PS dhe LSI. Jo pak herë, Veliaj doli edhe kundër qëndrimeve zyrtare të PS-së në kohën e sherrit elektoral mes dy partive të majta PS-LSI. Kryebashkiaku Veliaj mbrojti tezën se aleancat politike duhen vlerësuar për reformat që prodhojnë dhe jo për debatet. Në këtë linjë, ai e vlerësonte bashkëpunimin PS-LSI si të dobishëm për qeverinë dhe për gjithë këshillat bashkiak në vend. Kundër kësaj linje ishte pjesë tjetër në PS e kryesuar nga Saimir Tahiri.

Me sa duket e ka kapur në ajër Lulzim Basha këtë debat në PS dhe po sulmon kryebashkiakun e Tiranës, pasi kështu kënaq jo vetëm qytetarët, por edhe një pjesë të PS-së e cila mbetet kundër Erion Veliajt.

Taktikisht selia blu po luan bukur duke përdorur këtë sherr në kupolën e PS-së, Por për të qenë të besuar si opozitë, e cila synon të ringrihet pas humbjes, ajo ka nevojë të godasë kryeministrin. Nëse PD-ja vepron si ditën e 25 qershorit kur nuk doli asnjë minutë për të folur për votimet dhe blerjen e votës, atëherë marrëveshja Rama-Basha vazhdon.

Lulzim Basha ka një zgjidhje: Sulm total Edi Ramës dhe zhbërjen e pazarit të datës 18 maji 2017.