Nesër fushata elektorale do të mbyllet zyrtarisht. Deri në mbylljen e kutive të votimit ditën e Dielë në orën 19:00, do të jetë heshtje zgjedhore, gjatë të cilës asnjë aktivitete zgjedhor nuk do të kryhet nga asnjë parti apo media.

Qendrat e votimit në të gjtihë vendin do të hapen ditën e dielë në orën 07:00 të mengjesit dhe do të mbyllen në orën 19:00 të mbasdites. Por nëse në qendrat e votimit ka ende qytetarë në radhë ato do të qendrojnë të hapura deri sa të votojnë të gjithë qytetarët e pranishëm.

Qendrat e votimit do të drejtohen nga Komisionet Qendrore të Votimit (KVQ), shumë prej të cilave, ende duhet të plotësohen me anëtarë.

Përveç anëtarëve të KQV-së, në qendrat e votimit do të jenë të pranishëm edhe vëzhgues nga parti politike të ndryshme si dhe vëzhgues të pavarur vendor dhe ndërkombëtar nga Komiteti I Helsinkit, OSBE-ja, ambasadat e huaja dhe BE-ja. Gjithahstu të pranishëm do të jenë dhe gazetarë të akredituar nga Komisioni Qendror Zgjedhorë.

Votuesit do të zgjedhin një nga partitë e listuara në fletën e votimit. Ato nuk kanë të drejtë të zgjedhin kandidat të veçantë. Në fletën e votimit ka 18 parti të cilat konkurojnë për 140 mandate në Kuvend. Ndarja e mandateve bëhet në bazë të sistemit zgjedhor rajonal.

Çdo zonë ndahet në disa Zona Administrative Zgjedhore (ZAZ),  të cilat monitorojnë Qendrat e Votimit (QV).

Pas mbylljes së qendrave të votimit, kutitë e votimit mbyllen, vulosen dhe transportohen nën kujdesin e policisë në qendrat e numërimit. Qendrat e Numërimit (GNV) mbikëqyren nga Komisionet e Zonave të Administrimit Zgjedhorë (KZAZ). Çdo votë e diskutueshme i dërgohet KZAZ për vlerësim. Nëse KZAZ nuk arrin një marrëveshje çështja i kalon KQZ-së.

Rezultatin e votave të numëruara QV ia kalon ZAZ-së dhe më pas ai bëhet publik, në fillim tek të gjithë vëzhguesit dhe gazetarët e pranishëm. Kjo është hera e parë që rezultati i ZAZ-së do të shpallet në këtë mënyrë. Në të shkuarën rezultatet bëheshin publik vetëm nga KQZ-ja.

Por, sidoqoftë, një parashikim mbi rezultatin e mundshëm përfundimtarë të zgjedhjeve krijohet disa orë pas fillimit të numërimit.