Çfarë duhet të bëni?
Plotësoni formularin
dhe bashkëngjisni një Curriculum Vitae.
Pak rëndësi ka se sa keni jetuar,
Cv-ja sa më e shkurtër të jetë, aq më e mirë del.
Jini konçiz, përzgjidhni faktet.
Zëvëndësoni peisazhet me adresa,
kujtimet ngjethëse me data të sakta.
Prej të gjitha dashurive, përmendni vetëm atë të martesës,
prej të gjithë fëmijëve tuaj, vetëm ata që kanë lindur.
S’ka rëndësi se kë njihni, por nga ana e kujt njiheni.
Udhëtimet- vetëm ato jashtë shtetit.
Anëtarsimet- vetëm shkakun, kurrsesi qëllimin.
Çmimet- vetëm ato që keni fituar, e jo mënyrën se si i keni fituar.
Shkruajeni CV-n tuaj a thua se asnjëherë s’keni folur me veten,
sikur me veten tuaj ju ndanë një biçim distance.
Qetësisht kapërcejini qentë, macet, kujtimet e pluhurosura, miqtë e zemrës
dhe ëndrrat.
Çmimi përpara vlerës,
titulli përpara përmbajtjes.
Madhësia e këpucëve përpara rrugës që ato ndjekin.
Veç kësaj, mos harroni fotografinë që tregon vetëm njërin vesh tuajin.
Rëndësi ka forma, e jo ajo se çfarë dëgjon.
Fundja, çka për t’u dëgjuar?
veç zhurmës së makinerisë duke shkërmoqur fletën.