Rekord për Lotarinë Amerikane dhe një lajm për mjekët

Personat që kanë aplikuar për Lotarinë Amerikane DV 2018, mund të kontrollojnë sot pas orës 18:00 statusin e tyre përmes faqes së internetit të Departamentit Amerikan të Shtetit, për të parë nëse janë përzgjedhur për të vijuar aplikimin.

Departamenti i Shtetit nuk do të dërgojë njoftime për të përzgjedhurit apo letra me postë ose email.

“Çdo njoftim me email ose letër që ju deklaron se jeni përzgjedhur për të marrë lotarinë nuk vjen nga Departamenti i Shtetit dhe nuk është i ligjshëm,” thekson ambasada.

Mijëra shqiptarë do të kërkojnë online nëse janë të përzgjedhurit fatlumë.

Ende nuk dihet se sa persona kanë aplikuar nga Shqipëria për të fituar atë që njihet si Lotaria Amerikane.

Vjet u raportua se kishin aplikuar mbi 200 mijë shqiptarë, në një total prej 14.5 milionë aplikues.

Sivjet numri i aplikuesve i ka kaluar 19 milionë kërkesa, çka shton spekulimet se edhe numri i shqiptarëve të jetë më i lartë.

Megjithatë rekordin e mban Gana në Afrikë, ku aplikojnë çdo vit të paktën 1.7 milionë persona.

Në raportin e Departamentit Amerikan të Shtetit, Shqipëria renditet si një ndër vendet me më shumë fitues në Europë, në lotarinë e 2015-ës. I njejti trend pritet të ruhet edhe për këtë vit.

2956 shqiptarë u përzgjodhën me anë të këtij programi për të jetuar dhe punuar në SHBA, duke u pozicionuar të pestët në listë për Europën.

Në vend të parë në 2015-ën u rendit Ukraina, me 4679 fitues, e ndjekur nga Uzbekistani, Rusia dhe Turqia. Armenia është renditur në vend të shtatë dhe është shteti i fundit nga ku kanë dalë më shumë se 2 mijë fitues.

Dëshira për një jetë më të mirë po i shtyn jo vetëm shqiptarët e varfër, që të largohen larg vendit.

Para pak ditësh, një gazetë lokale e Voralberg-ut në Austri raportonte se landi i tyre po vuan nga mungesa e mjekëve.

Sot një mjek përgjigjet në këtë gazetë se ndihma mund të vijë nga Shqipëria.

Urdhri i Mjekut në Shqipëri raportoi para disa kohësh se mbi 145 mjekë kanë kërkuar të largohen nga Shqipëria vetëm brenda vitit 2016.