FOTO: Barcelona bën të pabëshmen!

Barcelona realizon përmbysjen e madhe, atë që paralajmëroi Luis Enrique dje në konferencën për shtyp, por që askush nuk e besoi.

90 minuta të çmendura, të mbushura me emocion, prodhuan kualifikimin historik për ekipin e Barcelonës.

Ekipi katalanas e nisi mjaft mirë ndeshjen duke shënuar që në minutën e pestë me Suarez dhe pas autogolit të Kurzawa, mbyllën pjesën e parë me dy gola avantazh.

Edhe fillimi i pjesës së dytë ishte vazhdim i të parës, pasi Messi shënoi nga pika e penalltisë në të 50-ën dhe  dërgoi shifrat në 3-0.

Përmbysja e madhe ishte vetëm 1 gol larg dhe të gjithë filluan të besonin.

Futbollistët e Barçës u hodhën në sulm në kërkim të golit të radhës, por “harruan” të mbrohen dhe Edison Cavani u duk se vrau shpresat e kualifikimit duke shënuar në minutën e 62-të një gol sa për  dy, pasi tashmë katalanasve ju duheshin edhe 3 gola të tjerë për t’u kualifikuar.

Megjithatë, katalanasit treguan se çfarë mund të ndodhë nëse beson deri në fund.

Arritën të shënojnë edhe dy gola të tjerë me anë të brazilianit Neymar, në minutën e 88’ dhe 90’.

Qershia mbi tortë, goli i Sergio Robertos, në minutën e pestë shtesë, u dha kualifikimin historik në një ndeshje që do mbahet mend gjatë në historinë e futbollit.