Federata e Futbollit Kinez po ideon projektin. Objektivat kryesore janë: 50 milionë futbollistë të rinj dhe fitimi i të drejtës për të organizuar Botërorin e vitit 2050.

Kina i vë gishtin futbollit. Tashmë po kalohet nga fjalët te veprat duke e bërë çdo gjë më të qartë. Pekini ka vendosur të formojë futbollistë të rinj dhe të talentuar për të kapur majat e futbollit botëror në harkun e 30 viteve. Një objektiv shumë ambicioz që synon formimin e rreth 50 milionë futbollistëve të rinj në Kinë brenda vitit 2025, si dhe organizimin e Kampionatit Botëror 2050 falë 50 mijë akademive dhe 70 mijë fushave të reja të futbollit.

Kina e ka marrë seriozisht. Pas shpenzimeve stratosferike të disa klubeve kineze për blerjen e disa yjeve që luanin në Europë, qeveria e Kinës ka vendosur të kalojë tek infrastruktura, një fazë që do të ndihmojë së tepërmi zhvillimin e futbollit në vend. Duke lënë mënjanë shifrat, po flitet për një plan investimesh impresionues. 70 mijë fusha të reja futbolli në të gjithë vendin do të mundësonin krijimin e 50 mijë shkollave të reja, të cilat brenda vitit 2025 do të ishin në gjendje të formonin 50 milionë futbollistë.

Një “ushtri” me futbollistë, e cila falë edhe përvojës së Marcello Lippi-t (trajnerit të kombëtares kineze) synon t’i bashkohet elitës së futbollit botëror. “Kjo është një metodë konkrete për të rritur futbollin në vend. Kjo për ne nuk është më një ëndërr”, deklaron zv.presidenti i Federatës Kineze, Wang Dengfeng. Nga ana tjetër, Presidenti i Republikës Popullore të Kinës, Xi Jinping, është shprehur qartë mbi objektivat e këtij projekti, duke deklaruar se ndër prioritetet kryesore është fitimi i së drejtës për të organizuar Kampionatin Botëror të vitit 2050.