Sipas studimit të bërë publik nga kompania amerikane Nielsen, 31% e popullsisë kineze është e pasionuar pas futbollit, sporti më i ndjekur bashkë me NBA dhe tenisin.
Sipas raportit Real Madridi ndiqet nga 127 milionë fansa në Kinë duke qenë skuadra më e ndjekur. Pas Real Madridit, e cila është skuadra më popullore, natyrisht për shkak të sukseseve të shumta ndërkombëtare – gjejmë Inter dhe Milan, me 106 milionë mbështetës secila.

Ky klasifikim është befasues pasi në top 3 nuk gjejmë skuadra të Premier League, kampionat që ka investuar masivisht në shikueshmëri në Kinë.
Seria A në këtë këndvështrim i gëzohet faktit që 25 vjet më parë ka qenë kampionati i parë i huaj i transmetuar në Kinë.

Për Real Madridin është një avantazh i madh fakti që ka në përbërje të skuadrës Cristiano Ronaldo-n. Merengues kanë edhe një shkollë futbolli ndërkombëtare në bashkëpunim me skuadrën e Guangzhou. Nuk duhet të lëmë pa përmendur që Castilla – skuadra e dytë e Realit – ka blerë lojtarin kinez Lin Liangming.

Megjithatë shumë klube europiane po punojnë për të rritur nivelin e futbollit në Kinë. Ashtu si Barcelona që kohët e fundit ka firmosur tre kontrata në vend, edhe Bajerni i Mynihut po investon në Kinë.
Për ata që ndjekin futbollin në Kinë, shpesh lojtarët janë më të rëndësishëm se vetë skuadrat.
Nuk është e vështirë të gjesh njerëz që ndjekin skuadra të ndryshme dhe që bëjnë tifo për skuadra rivale. Për këtë arsye është e vështirë të krijohet një ide se si ndahet tifozeria kineze.