Rama: Rrofshin shqiptarët! Basha: T’i kthejmë në atdhe

Shqipëria feston sot 104-vjetorin e shpalljes së pavarësisë.

Me rastin e kësaj feste, në të gjithë vendin janë parashikuar disa aktivitete.

Ndërkohë, me anë të një postimi në Facebook, kryeministri Edi Rama uroi të gjithë shqiptarët.

“GËZUAR DITËN E PAVARËSISË! Mirënjohje përjetë Ismail Qemalit dhe të gjithë etërve themelues të shtetit shqiptar! Rroftë Shqipëria dhe rrofshin shqiptarët kudo ku jetojnë!”

Ndërkohë Partia Demokratike feston sot 28 Nëntorin duke bërë homazhe në Varrezat e Dëshmorëve për të rënët e Luftës Nacional Çlirimtare.

Kryetari i PD-së, Lulzim Basha, duke përcjellë urimin për 28 Nëntorin, bëri thirrje për bashkim për ta bërë Shqipërinë një vend ku kthehen shqiptarët e jo largohen.

“Gëzuar 28 Nëntorin. Të nderojmë sakrificën e dëshmorëve të Kombit duke u bashkuar për ta bërë Shqipërinë një vend ku kthehen shqiptarët e jo largohen”.

Për të nderuar të rënët, homazhe mbajtën edhe ish-kryeministri Sali Berisha dhe deputetë të tjerë të PD-së.

Shqipëria u shpall e pavarur në Vlorë, më 28 nëntor 1912, nga Ismail Qemali.