Motori i dashurisë

Vespa feston ditëlindjen e 70. Për të gjithë vespistët në Tiranë, organizohet edicioni i katërt i paradës për këtë motor ikonë, jo vetëm të kulturës italiane, por të mbarë botës. Vespa nuk është vetëm një mjet transporti, por edhe një mënyrë jetese.

Pa dallim modeli apo fuqie, në këtë paradë pjesëmarrja e tyre përfshinte gjithë qytetet kryesore të Shqipërisë, por edhe rajonin.

Shpëtim Ahmetaj, President i “Vespa Fanatics Tirana”, shprehet: “Kemi vespistë nga Dubrovniku, Roma dhe Rimini. Presim edhe nga Maqedonia”.

E dalluar për klasin dhe elegancën në dizajn, Vespa është motori më popullor dhe fanatikët e saj e quajnë dashuri. “Nganjëherë edhe i flas. Më duket sikur e kam shoqe”, shton Ahmetaj.

Ndërsa një i apasionuar italian pas këtij motori, Claudio Fiori, thotë: “Vespa është një dashuri dhe një stil jetese. Na mëson të udhëtojmë dhe të njohim shumë njerëz”.

Një festë që zhvillohet në rrugë, për të pushtuar Tiranën si me grenza, Vespa prezanton simbolin e një stili jete gjithmonë tërheqës.

“Vespa është shndërruar në idhull në të gjithë botën sepse është praktike dhe ekonomike. Por, edhe është një ikonë mode sepse është përdorur për filma dhe reklama”, tregon Gino Pepe.