Pse albumi më i shtrenjtë në botë është në duart e Martin Shkrelit?

Reperë, konspiracione farmaceutike, një kasafortë sekrete dhe… Hillary Clinton dhe Donald Trump bien për herë të parë dakord për diçka.

Misteri që rrethon lançimin e albumit të fundit të grupit Wu-Tang Clan është realisht një thriller mjaft interesant. Ndër të tjera, sepse e vetmja kopje ka përfunduar në duart, siç e cilësoi dikur BBC, të njeriut më të urryer në botë, Martin Shkrelit.

Për parantezë, misteri i kësaj historie do të mbetet pa zbuluar nga pjesa më e madhe e popullsisë aktuale sepse do të mbahet sekret deri në vitin 2103.

I lodhur nga pirateria, e cila ka shkatërruar vlerën e muzikës, lideri i grupit legjendar njujorkez Wu-Tang Clan vendosi të regjistrojë një album të fundit dhe ta bëjë atë albumin më të çmuar në historinë e muzikës.

Krijimet e Robert Diggs (emri artistik RZA) kanë ende ndikim tek reperat më të mirë aktualë si Drake apo Kanye West. Duke shfrytëzuar markën Wu-Tang, grupi ka publikuar albumin e lamtumirës “Once upon a time in Shaolin”.

Ekziston vetëm një kopje e tij që do të qëndrojë e fshehur për 88 vjet. CD-ja përmban 31 këngë, është punuar për 6 vjet dhe shoqërohet me një libër prej 174 faqesh të lidhura në lëkurë. Dy “thesaret” vendosen në një kuti të dizenjuar nga një artist maroken. Albumi dhe libri është ruajtur në një kasafortë në qytetin e Marrakech në pritje që të blihej në ankand nga ofertuesi më i madh.

Palët e interesuara dhe disa fansa fatlumë kanë dëgjuar vetëm 13 minuta nga albumi në një dhomë private të MoMA (Muzeu i Artit Modern në Nju Jork), një përvojë që vetë Diggs e përkufizoi si “një koncert të Mozartit”. Kritikët e pranishëm u shfaqën të entuziazmuar me ato 13 minuta ku bazat e hip-hopit elektronik bashkoheshin me zëra të regjistruar, si ai i Cher.

Në bazë të kontratës në 88 vitet e ardhshme, blerësi nuk lejohet të tregtojë albumin, por mund të publikojë atë falas nëse dëshiron. Por albumi u ble për afro 2 milionë dollarë  nga një person që nuk ka aspak ndërmend ta ndajë atë thesar të çmuar muzikor. Fillimisht u tha se blerësi misterioz ishte Quentin Tarantino.

Megjithatë më vonë u zbulua se ai ishte njeriu me më shumë dëshirë për të tërhequr vëmendjen e planetit, Martin Shkreli.

Martin Shkreli (33 vjeçar) u lind më 1 prill në Nju Jork në një familje emigrantësh shqiptarë. Prindërit e tij punonin si pastrues, por Shkreli synonte lart. Në moshën 19 vjeçare ai u diplomua dhe themeloi kompani të ndryshme farmaceutike.

Qëllimi i tij ishte që të blinte patentën e ilaçeve për sëmundje të rralla dhe për të përmirësuar efektivitetin e tyre. Kjo mund ta shndërronte në hero dhe shpëtimtar, por historia nuk përfundon këtu. Martin po kurdiste një plan djallëzor.

Ai ngriti çmimin e Daraprim, një ilaç që trajton toksoplasmosis (një infeksion parazitar që ndikon në sistemet imunitar të dobësuar, si pacientët shtatzëna ose me AIDS) nga 12 euro në 672 euro.

Kjo rritje e çmimit prej 5,000% është një praktikë e zakonshme në industrinë farmaceutike, por asnjëherë nuk ka prekur kornizat e skandalit. Ndërsa këtë herë gjërat ndryshuan, dhe jo rastësisht. Karakteri ekscentrik dhe arrogant i Shkrelit e bënte atë keqbërësin e përsosur për shtypin, falë të cilit politikanët mund të dilnin heronj.

Hillary Clinton shkroi në Twitter se si presidente do të anulonte ligjet që mbronin këto praktika. Ndërkohë, Donald Trump thotë se Shkreli “sillet si një fëmijë i përkëdhelur”. Shkreli u prek nga ky sulm: “Prindërit e mi ishin pastrues, ndërsa Trump e ka të trashëguar të gjithë pasurinë e tij. Dhe unë që mendoja se mund të bëheshim miq”.

Kur Shkreli u shndërrua në një vegël politike (në fund të fundit praktikat e tij kanë vite që ndodhin në industrinë farmaceutike), shtypi reagoi ashpër. Mbrojta e tij ishte: “Puna ime është që të maksimizoj  fitimet e investimeve të mia. Është njësoj si të kritikosh një basketbollist që bën shumë pikë” .

Sa më të dhunshme bëheshin reagimet në rrjetet sociale aq më tej shkonte ai, duke thënë se duhej ta ngrinte çmimin akoma më shumë.

Martin Shkreli i pëlqen metaforat. Disa nga shpjegimet që ai dha ishin: “Daraprim ishte si të shisje një Aston Martin me çmimin e një biçikletë” apo “hyrja në Disneyland Resort nga 3 euro është rritur në 95 euro në 45 vitet e fundit”.

Nuk ka dyshim që i pëlqen muzika. Ndër thesaret e tij më të çuditshme janë: një makinë Enigma origjinale e projektuar nga Alan Turing dhe karta e kreditit të Kurt Cobain.

Dhe tani për dy milionë dollarë, ai zotëron kopjen e vetme të albumit më të shtrenjtë në histori. Shkreli u mbrojt me të njëjtën mënyrën si me Daraprimin: “Nuk e di pse ankoheni, askush nuk e bleu albumin e fundit të [Wu-Tang Clan], e as të parafundit,  edhe pse kushtonte 10 dollarë”.

Si pjesë e marrëveshjes, Martin Shkreli dhe lideri i Wu-Tang Clan, RZA, darkuan së bashku. RZA i ofroi Shkrelit të dëgjonte më shumë këngë nga albumi para formalizmit të blerjes por ai i’u përgjigj: Asistenti im do t’i dëgjoj sepse nuk kam kohë.

Duket qartë që Martin Shkrelit i pëlqen vëmendja dhe ka para` të mjaftueshme për ta marrë atë, përmes praktikave moralisht të diskutueshme, por ama të ligjshme.

Dita