Pas një bisede në televizion… muhabet kafenesh me çunat e lagjes

Profesor Çapajev Gjokutaj, ashtu sikurse një pjesë e mirë e shqiptarëve të interesuar për ligjin e mbetjeve ka ndjekur me interes bisedën e kryeministrit Edi Rama me gazetarin Blendi Fevziu këtë të enjte. Por e gjitha, profesorit i ka lënë një shije të keqe.

“Hera-herës harroja se në ekran ishin kryeministri i vendit dhe njëri nga gazetarët më të talentuar. Më bëhej se ndiqja një bisedë kafenesh ku hahen me fjalë çunat e lagjes”, shkruan profesor Gjokutaj.

“Kam akoma një shije të keqe nga Opinion-i i Fevziut. Jam i bindur që Edi Rama nuk është konsekuent në qëndrimet për mbetjet. Më e pakta: ka bërë retorikë baroke, që tani po i kthehet kundra. Por dyshoj se emisione si ai i mbrëmshmi, më shumë se me publicistikë, ngjajnë me mbetje të pariciklueshme. Gazetari në raste të tilla nuk mban ligjërata litar, por me pyetje te zgjuara dhe fakte konçize militon për të vërtetën dhe mbron interesin publik.

Mbrëmë Fevziu dukej si ushtar në mbrojtje të sedrës së vet. Proliks në rrafsh profesional, arrogant në rrafsh etik, i pasigurt dhe ankcioz në rrafsh psikologjik. Sikur të ishte në duel për jetë a vdekje. Hera-herës harroja se në ekran ishin kryeministri i vendit dhe njëri nga gazetarët më të talentuar. Më bëhej se ndiqja një bisedë kafenesh ku hahen me fjalë çunat e lagjes”– shkruan profesori në faqen e tij në Facebook.