Çfarë dimë deri tani?-Avioni i rrëzuar në Ishëm

Dje, një avion i dyshuar për transport droge u rrëzua në Ishëm. Ja rrjedha e ngjarjeve:

• Të enjten një avion ultra i lehtë u rrëzua në Ishëm.

• Avioni drejtohej nga piloti italian Guido Guidi, 69 vjeç.

• I pari i cili dha lajmin ishte deputeti i PD-së Flamur Noka. Ai tha se avioni ishte i ngarkuar me drogë.

• Policia njoftoi se piloti ishte nisur nga Bari drejt veriut të Italisë me qëllim një udhëtim turistik. Por në lartësinë 4-5 mijë këmbë pësoi një defekt dhe bëri ulje të detyruar në Ishëm.

• Gazetari Artan Hoxha, në emisionin Opinion, deklaroi se piloti italian kishte ardhur për të studiuar pistën sepse pas dy muajsh do të transportonte 200 kilogram hashash.

• Pas mbarimit të emisionit gazetari Hoxha u shoqërua në prokurori me akuzën e dekonspirimit të hetimeve.

• Prokuroria liroi, sot rreth orës 3:00 të mëngjesit, pilotin italian. Ai do të qëndrojë në një hotel në Tiranë dhe sot do të merret sërish në pyetje nga prokuroria.

Çfarë dimë për ngjarjen:

• Avioni nuk kishte leje fluturimi për në Shqipëri.

• Në Ishëm ishte sajuar një pistë ulje për avion të lehtë.

• Brenda avionit nuk u gjet drogë.

• Piloti ishte një sipërmarrës në fushën e fluturimeve me avion ultra të lehtë. Ai ishte i dënuar më parë në Itali për nxitje të korrupsionit.