Tahiri-Veliaj, duel i “ashpër” prej meteorologësh

Parashikimet nga rrjetet meteorologjike vendase dhe të huaja që paralajmërojnë reshje të dendura shiu në vendin tonë, e kanë detyruar kreun e Bashkisë Tiranë, Erion Veliaj, që të ftojë shtabin e emergjencave për të ndarë detyrat për 24 administratorët dhe për të gjitha ekipet lokale të ndihmës, si dhe marrjen e të gjitha masave për përballimin e problematikave që mund të shfaqen gjatë mbrëmjes së sotme dhe ditës së nesërme.

“Bashkia e Tiranës ka angazhuar të gjitha ndërmarrjet e saj për të ndërhyrë e ardhur në ndihmë të qytetarëve për çdo situatë emergjente që mund të krijohet. Ndërmarrjet e rrugëve, pastrimit, kanalizimeve, ndriçimit, Policia Bashkiake, Inspektorati i Mbrojtjes së Territorit dhe Zjarrfikëset, kanë ngritur grupe të posaçme pune dhe do të jenë në terren, në shërbim të qytetarëve nga mbrëmja e sotme, së bashku me administratorët e 24 njësive administrative”, thuhet në deklaratën e Bashkisë Tiranë.

Ndërkohë, edhe ministria e Punëve të Brendshme është parë e angazhuar për herë të parë në rrjetet sociale, lidhur me parashikimin e motit dhe masat që duhen marrë.

“Nisur nga situata e pritshme që pritet të krijohet nga intensiteti i lartë i reshjeve në datat 5 dhe 6 Shtator 2016, Ministria e Punëve të Brendshme u ka kërkuar drejtuesve të institucioneve shtetërore qendrore dhe lokale të marrin masa parandaluese dhe reaguese në kohë. Për këtë arsye, Ministri i Punëve të Brendshme ka urdhëruar ngritjen e Shtabeve të Emergjencës në çdo Prefekturë e Bashki, duke vënë në gatishmëri të gjitha kapacitetet njerëzore e teknike operacioanale për të reaguar sipas situatës. Ndërkohë Drejtoritë e bordeve të kullimit, strukturat e hidrovorëve, si dhe OSHEE, jane njoftuar te nisin nga puna menjëherë për të minimizuar pasojat që mund të shkaktohen nga reshjet e dendura. Ministria e Punëve të Brendshme këshillon gjithashtu qytetarët të tregohen të kujdeshëm në lëvizjet gjatë orëve të reshjeve intensive të shiut”, – shkruhet në njoftimin e MPB.

Në këtë mënyrë ministri i Brendshëm Saimiri Tahiri dhe kryebashkiaku i Tiranës Erion Veliaj, dy yje në shkëlqim në PS, të cilët rivalizojnë gjithashtu edhe për lidershipin e ardhshëm të Partisë Socialiste pas Edi Ramës, kanë hyrë në një duel në distancë për të njëjtën çështje, në përpjekje për të treguar se cili prej të dyve ka modelin më efikas për çështjen sinoptike dhe meteorologjike./Mapo