Edhe Ghetto Geasy me Majk blejnë klikime

Big Basta, një prej reperave të njohur në Shqipëri, në një intervistë të fundit për revistën Bordo, ka treguar për prodhimet e fundit muzikore dhe për situatën në të cilën ndodhet muzika shqiptare kohët e fundit. Në tekstet e tij dhe sidomos në këngën e fundit, “M’vini onash”, e lançuar këtë verë, duket sikur reperi është treguar pak i ashpër me aktualitetin dhe kolegët, por, siç thotë ai, është e vështirë që në çdo prodhim të tijin muzikor të mos jetë Big Basta, ndaj edhe mbetet mjaft origjinal:

“Unë gjithmonë jam unë, nuk kam ndryshuar në asnjë lloj momenti. Kritikën e kam në plan të parë dhe është një projekt i cili i përgjigjet kohës që po jetojmë, ku edhe më injoranti ka të drejtë të komentojë – fati i tyre, as nuk i kundërshtoj fare. Atëherë unë nxjerr një këngë me refrenin “M’vini onash” i cili e ka përgjigjen brenda…” – tregon Big Basta.

Por Big Basta vijon të jetë selektiv në bashkëpunimet me kolegët dhe kërkon muzikë të pastër. Ai thotë se një njeri i cili nuk arrin të gjejë veten në një rrymë muzikore, ka problem me intelektin dhe karakterin e vet, pa harruar të përmendë se shumë prej artistëve shqiptarë i blejnë klikimet:

“Artistët nuk do të bazonin famën tek klikimet e vjedhura, sepse dreqi e mori, s’mund të ketë Rita Ora 12 milionë klikime, të cilën në fund të fundit e dëgjojnë të gjithë shqiptarët dhe e gjithë bota, dhe një këngë shqiptare që i kalon apo s’i kalon kufijtë të ketë 60 milionë klikime. Kemi rastin kur Majk me Ghetto Geasy këngën “S’jena mo”, kanë shkuar 70 milionë klikime dhe Willi William me këngën “Ego” i ka apo s’i ka 60 milionë, ose nuk i kishte. Unë i kam miq që të gjithë këta që përmenda dhe nuk më vjen turp t’ua përmend të metat e veta, ashtu siç do doja që edhe ata të më përmendin të metat e mia…” – rrëfen më tej Big Basta.

I ndodhur përballë këtij kaosi muzikor, Big Basta thotë se sfida më e madhe e çdo artisti në këtë moment është lufta ndaj ballkanizmit dhe e drejta e autorit:

“Sfida më e madhe që ka çdo artist, jo vetëm muzikant, por edhe piktor, edhe fotograf, edhe të gjithë, është ‘ballkanizimi’. ‘Ballkanizimi’ është sfida më e… a mund ta them që është sfida më ‘e ndyrë’ që mund të ketë në art?…. Ky është Ballkani në fund të fundit. Tjetra është mungesa e së drejtës së autorit. Kjo është sfidë akoma më e madhe sesa ‘ballkanizimi’. Një ndër dhjetë pikat kryesore në kartën e të drejtave të njeriut është ruajtja e pronës intelektuale….”