Briken Çalja ngjitet në vend të pestë në Rio, ja çfarë ka ndodhur

Në Rio, ka ndodhur skualifikimi i parë i një medalisti dhe ndodh pikërisht në garën ku luante një shqiptar. Një ngjarje jo e këndshme për peshëngritësin e Kazakistanit, Izzat Artykov, por një fitore për Briken Çaljan.

Sot, është njoftuar që peshëngritësit 22-vjeçar i është hequr medalja e bronztë për shkak të rezultateve pozitive në testet e dopingut.  22-vjeçari nuk ka pasur një formë shumë të mirë këtë vit, por arriti të merrte titullin aziatik në Tashkent në prill dhe më pas ngriti 339 kg duke marrë medalje të bronztë në Rio për garën deri në 69 kilogramë.

Në këtë garë, peshëngritësi shqiptar Briken Çalja doli i gjashti, por skualifikimi i Artykov, e ngjit atë në vend të pestë. “Faleminderit Zot.. i 5 ne Lojrat Olimpike, nje rezultat historik!!!”, shkruan Çalja.

Pas këtij skualifikimi, do të ketë një tjetër sportist që do marrë medaljen e bronztë pa hipur në podium, Mosquero Lozano, nga Kolumbia.