S’mbahet shtëpia me miell hua

Sa bukur e ka thënë populli i Gjirokastrës kushedi sa kohë më parë. Kjo shprehje le të vlejë edhe si provë se njerëz të zgjuar ka pasur me shumicë ky vend,  përderisa kanë themeluar shprehje kaq lakonike.

Thënia e mësipërme që unë e kam zgjedhur për titull nuk ka nevojë të shpjegohet sepse është shumë e qartë dhe popullore në vetvete. Unë thjeshtë, dua ta sjell atë për të interpretuar një zhvillim interesant të ditëve të fundit. E kam fjalën për debatin e hapur mbi kalimin e disa futbollistëve të kombëtares drejt asaj kosovare.

Në fillim nuk ma mori mendja se do bëhej temë e rrjeteve sociale dhe e portaleve, por duke e ndjekur vura re se po ndodhte e kundërta. Ndoshta një debat edhe i cytur pak prej disa gazetarëve me portalet e tyre, por prapë se prapë vura re shumë debat në lidhje me këtë temë. –Heu, thash me vete!!! -Si ka mundësi?

-Si ka mundësi që revoltohemi nga kalimi i tyre te Kosova, kur themi që Kosovën e kemi xhan.

-Si ka mundësi që mërzitemi,  kur nuk kemi asnjë meritë në përgatitjen e tyre profesionale si vend. Pasi e dimë që janë formuar dhe afirmuar jashtë.

-Si ka mundësi që nuk e kuptojmë që jemi në demokraci dhe secili bën me karrierën e vet çfarë të dojë.

-Si ka mundësi që kërkojmë vetëm nga të tjerët të bëjnë sakrifica për vendin. Pse nuk pyesim veten se çfarë jemi duke i ofruar ne si individë vendit.

-Si ka mundësi që nuk e kuptojmë se zgjedhja e të dytës nuk do të thotë mohim i të parës. Ata zgjedhin Kosoven por vazhdojne ta duan Shqipërinë. (Rashica-Ky vendim nuk eshte nje vendim kunder Shqiperise. Me teper eshte nje zgjedhje per Kosoven, mbasi une aty kam linde dhe jam rrit.)

E shumë ‘si ka mundesi’ të tjera,  pak më informale që më erdhën në mend por që nuk po i përmend këtu.

T’i falenderojmë me mirënjohje për kontributin e deritanishëm kosovarët e mrekullueshëm shqipëtarë, për djerësen që kanë derdhur për kombëtaren, dhe për emocionin që i kanë dhuruar deri tani. Dhe si vend duhet të shohim të rrisim kombëtaren tonë dhe suksesin tone. Të mos kemi xhelozi për askënd, madje përkundrazi të gëzohemi me idenë që Kosova ia mbërriti më në fund kësaj ditë.

Dhe e fundit, nuk mbahet shtëpia me miell hua. :))

Bilbil Beqiri/Podiumi.com