Berlini konfirmon rolin protektor për Shqipërinë

Mosarritja e dakordësisë për reformën në drejtësi ka alarmuar Berlinin që nisi me ngut në Tiranë, ministrin e Jashtëm, Frank Walter Steinmeier. Në konferencën për shtyp me ministrin Bushati shefi i diplomacisë gjermane konfirmoi interesin direkt të Gjermanisë për afrimin e Shqipërisë me Bashkimin Europian.

“Kam ardhur këtu edhe për tema serioze sikurse është reforma në drejtësi….Ne kemi realisht një interes që ky vend të bëjë përpara në rrugën e tij të përafrimit evropian. Kemi një dritare mudësish tani dhe në raportin e vjeshtës që do përcaktojë vijimësinë e reformave në Shqipëri, nëse do përcaktohen mangësi të tilla, si reforma atëherë procesi i anëtarësimit nuk mund të marrë shpejtësi, për këtë arsye unë jam këtu për të diskutuar me përfaqësues të qeverisë dhe opozitën, për të thënë që është një situatë që palët duhet të mendojnë për të ardhmen e vendit, shpresoj të jetë e suksesshme, nëse s’do jetë kështu e konsideroj të drejtë atë që ju nënkuptoni me pyetjen tuaj. Do jetë shumë vendimtare ajo çka do ndodhë në muajt e ardhshëm”- deklaroi ministri gjerman.