Asnjë përgjegjës për helmimin tek Artigiano

Blerina Spaho
AKU nuk ka asnjë informacion në lidhje me helmimin tek Artigiano. Zëdhënësi për shtyp i Autoritetit të Kontrollit të Ushqimeve, Granit Sokolaj, u shpreh se ky institucion nuk disponon asnjë dokument apo të dhënë mbi atë çka ka ndodhur disa ditë më parë ku rreth 50 persona pësuan helmim ushqimor tek bar-restorant Artigiano në zemër të ish-Bllokut.
AKU “jashtë loje”
Sipas Granit Sokolaj AKU nuk ka ndërmarrë asnjë veprim ligjor pasi e ka gjetur këtë lokal të bllokuar nga Drejtoria e Shëndetit Publik dhe ende nuk posedon ndonjë informacion mbi analizat e kryera të monstrat e ushqimeve të marra tek ky restorant. Sokolaj gjithashtu është shprehur se në muajin shkurt ky restorant është gjobitur me 100 mijë lekë për mosdisponim të dokumenteve shoqëruese të disa produkteve që përdoreshin për gatim.
Nuk është salmonelë!
Ndërkohë shefja e epidemiologjisë në Drejtorinë e Shëndetit Publik, Ermelinda Murati është shprehur se nga analizat e kryera mbi monstrat e ushqimeve të marra nga restoranti Artigiano, asnjëri prej tyre nuk rezulton të jetë infektuar me salmonelë. “Do të bëjmë kontrolle të tjera, por deri më tani nuk na rezulton se personat e shtruar gjatë javës së kaluar në Qendrën Spitalore “Nënë Tereza” të jenë helmuar nga salmonela si pasojë e konsumimit të ushqimit në këtë restorant”, tha Dr. Linda Murati.
Ndonëse analizat dhe kontrollet për këtë rast vazhdojnë, asnjë institucion përgjegjës nuk ka një përgjigje se pse përfunduan në spital dhjetëra persona me temperaturë të lartë, të vjella dhe marrje mendsh të forta.
Mirë që siguria në restorante është bërë si ruleta ruse “të zë, s’të zë”, së paku a mund t’u thuhet këtyre njerëzve se çfarë i çoi në spital?!