Krahas numrit më të madh të aeroplanëve ushtarakë në botë, teknologjisë më të sofistikuar ajrore dhe kundërajërore, SHBA-të janë pakonkurencë edhe kur bëhet fjalë për aeroplanmbajtëset.
Mjafton të themi që, vetëm një aeroplanmbajtëse e SHBA-ve, nga 10 të tilla, e quajtur, USS John C Stennis, posedon forcën më të madhe ajrore se 70% e ushtrive tjera të botës.
Aeroplanmbajtësja e flotës luftarake-detare amerikane (US Navy) – USS John C Stennis, ka një ekuipazh mbi 6,000 personash, marinarë, pilotë dhe pjesëtarë të tjerë të stafit. Ajo është e gjatë 333 metra, peshon mbi 100.000 tonë, ndërsa mbartë mbi 80 aeroplanë ushtarakë të teknologjisë së fundit.
Dy reaktorët nuklearë të saj ndërkaq, prodhojnë energji elektrike që do të ishte e mjaftueshme për furnizimin e dy qytete të vogla.
USS John C Stennis mund të lundrojë me shpejtësi 56 km në orë, ndërsa energjia e siguruar nga reaktorët nuklearë i mundëson asaj të qëndrojë në ujërat botërore edhe përgjatë 22 viteve të ardhshme.
Kjo luftanije, vetëm në kuvertën e së cilës janë të angazhuar 200-400 pjesëtarë ushtarakë – mund të lansojë 20 aeroplanë brenda një ore, mund të godasë aeroplanët kundërshtarë, ndërsa është e pajisur me sistemet më të sofistikuara të radarëve.
Prodhimi i kësaj aeroplanmbajtëse, që ka nisur misionet e saj në vitin 1995, ka kushtuar jo më pak se 4.5 miliardë dollarë.
USS John C Stennis dhe luftanijet tjera amerikane, pas disa vjetësh do të shoqërohen në ujërat botërore nga një tjetër aeroplanmbajtëse e mahnitshme, “Gerald R. Ford”, po ashtu pjesë e flotës luftarake-detare amerikane.
Duhet të jeni i kyçur në mënyrë që të mund të lini një koment Kyçu