Kur iku Balili pse të mos ikë dhe Hasan Halili?

Ish-kryebashkiaku i Kukësit, Hasan Halilaj, i shpallur në kërkim nga policia, nuk gjendet në banesën e tij në Kukës. Policia nuk ka mundur ta vërë në pranga, pavarësisht disa kontrolleve.

Hasan Halilaj është një tjetër përfaqësues i LSI që pritet të arrestohet.

Pas rasteve në Lushnje, të ish-drejtoreshës së Arsimit, Luiza Tabaku, ish-shefit të Emergjencave po në Lushnje, apo rastit të zyrtarëve të tjerë të lartë, që përfaqësonin LSI në Korçë, Elbasan, Dropull apo dhe në ndonjë qytet, ish-kryebashkiaku i Kukësit është kryqëzuar nga drejtësia me akuzën e “shpërdorimit të detyrës”.

Pas Klement Balilit, i shpallur në kërkim ndërkombëtar për trafik droge, edhe Halilaj ka arritur të zhduket.

Policia e Kukësit shkoi të martën të ekzekutonte urdhrin e arrestimit, por nuk e gjeti në shtëpinë e tij, vetëm pak metra larg Drejtorisë së Policisë.

Katër makina qëndruan aty për disa orë, por familjarët i thanë shefit të policisë se nuk kanë asnjë dijeni ku ndodhej Halilaj dhe se në kontaktin e fundit që ata kishin pasur, ai ndodhej në Tiranë për çështje pune.

Nën akuzën e shpërdorimit të detyrës, Hasan Halilaj u padit nga drejtuesit e rinj të Bashkisë në datën 14 shtator 2015, për abuzim me fondet publike dhe financim të paligjshëm të futboll klub Kukesit dhe transferim të aksioneve të tij.

Tre muaj më vonë, më 16 dhjetor 2015, Bashkia e re e Kukësit bëri kallëzimin e dytë penal ndaj ish-kryebashkiakut për mospagesat e kontributeve të sigurimeve shoqërore e shëndetësore të punonjësve të Bashkise në një periudhë 4-vjeçare.

Një vlerë e cila kalonte 1 milion euro me gjobat dhe kamatëvonesat.

Që nga kallëzimi i parë e i dytë, Prokuroria e Kukësit zhvilloi hetimet përkatëse derisa i kërkoi Gjykatës së Kukësit arrestin me burg.

Tre ish-zyrtarët e tjerë u vunë në pranga menjëherë.

Hasan Halilaj erdhi në krye të Bashkisë Kukes në vitin 2007, si përfaqësues i Partisë Demokratike, parti të cilën e drejtoi në mesin e viteve 2000.

Mandatin e dytë, po nën siglën e PD-së, e mori në vitin 2011, por në maj të vitit 2013, në kulmin e fushatës zgjedhore parlamentare, Hasan Halilaj hoqi dorë nga PD duke deklaruar anëtarësimin e tij në Lëvizjen Socialiste për Integrim, nën siglën e së cilës kandidoi për mandatin e tretë të kryebashkiakut, por që humbi me më shumë se 3300 vota ndaj kryetarit të sotëm të Bashkisë, Bashkim Shehu.