Si të pastroni enët prej çeliku

Në këtë artikull do t’ju japim disa ide se si të pastroni enët prej çeliku që keni në shtëpi. Sigurohuni që të keni në dorë: sodë, amoniak, pluhur pjekjeje, limon dhe parafinë të ngurtë.

Kur sipërfaqja e një objekti prej çeliku paraqet njolla rezistente, të cilat nuk jeni në gjendje t’i pastroni, së pari duhet të bëni një larje me ujë dhe sodë, pas të cilës, për të eliminuar papastërtitë që mbeten, është e nevojshme të përdorni substanca gërryese. Në treg ka disa përbërës që aplikohen në sipërfaqe dhe risjellin shkëlqimin e objekteve.
Në rastin kur sipërfaqet e çelikut janë të sheshta, është më mirë të përdorni një produkt gërryes që të jetë në gjendje të gërryejë në thellësi. Për këtë, ju mund të merrni pak parafinë të ngurtë, e përzieni me një dozë të mirë sode buke dhe në fund me disa pika alkool. Në këtë mënyrë, ju do të përftoni një pastë gërryese, e cila duhet të zbatohet me majën e gishtave dhe pastaj të lihet të pushojë për 10 minuta, në fund pastrojeni me një leckë. Një shpëlarje përfundimtare dhe një tharje me tharëse flokësh do t’i japë çelikut shkëlqimin e tij natyror.

Ka edhe disa mjete natyrore të cilat janë në gjendje të heqin njollat dhe t’i japin sipërfaqes shkëlqimin e humbur. Mes këtyre përbërësve është limoni, amoniaku dhe soda e bukës.
– Limoni është padyshim nga produktet më të mira për të hequr smërçin, falë pranisë së acidit citric që shkatërron grimcat, duke i bërë ato të lëngshme dhe të eliminueshme krejtësisht.
– Ndërsa për të eliminuar mbetjet gëlqerore, amoniaku është shumë i përshtatshëm, pasi ai përmban substanca acidike që shkrijnë, nëse ato më parë janë lënë në ujë.
– Për t’i bërë objektet e çelikut të shkëlqejnë, duhet t’i trajtoni me një substancë gërryese. Në këtë rast, ne ju rekomandojmë të merrni një sfungjer dhe ta lyeni me një sasi të mirë sodë buke dhe pastaj filloni ta fërkoni sipërfaqen e çelikut në një drejtim të vetëm. Soda e bukës me mikrogranulat e saj mund të depërtojë në brendësi të zgavrave të vogla apo dhe të gërvishjeve për t’i eliminuar të gjitha papastërtitë.

Pasi të pastroni të gjitha objektet, i shpëlani me ujë të rrjedhshëm dhe pastaj i thani me një leckë të butë.