Mashtrimi me vizat kanadeze, nënë e bijë u dështon “arratisja”

Tre ditë pas zbulimit të skemës së mashtrimit të qytetarëve për viza në Kanada, policia ka ndaluar mbrëmjen e djeshme nënë e bijë, të cilat akuzohen se kanë mashtruar  27 persona duke u premtuar dokumente punësimi dhe studimi për në Kanada, Australi, Angli etj në këmbim të shumave të konsiderueshme të parave.

Sipas policisë  L. M, 52 vjeçe, dhe A. M, 28 vjeçe, lindur dhe banuese në Tiranë u ndaluan në Rinas teksa po tentonin të largoheshin nga Shqipëria.

Sipas hetimeve Prokuroria sqaroi një ditë me parë se, dy femrat ia shitën kompaninë për 1 euro 25 vjeçarit dhe u larguan.

Pjesë e këtij mashtrimi ishte edhe një person tjetër, 25-vjeçari Klevis Reshka,  të cilin policia e arrestoi dy ditë më parë.

Një ditë më parë Prokuroria e Tiranës zbardhi edhe skemën e mashtrimit. Sipas Prokurorisë kallëzimet ndaj tyre u bënë nga 26 persona, të cilët kanë shpjeguar se kanë aplikuar që në vitin 2014 për punësim dhe studime për në Kanada. Aplikimet i kishin bërë pranë shoqërisë ANDE–LM me administratore shtetasen L. M. që ndodhet me seli në rrugën “Ismail Qemali” Tiranë.

Pas kontaktit që këta shtetas merrnin me shtetasen L.M. ajo ju premtonte se shumë shpejt do të pajiseshin me vizë, dhe për këtë fakt të kryenin pagesat në bankë, për llogari të firmës ANDE-LM.

Njoftimi i policisë për ndalimin e dy shtetasve, nënë e bijë

“Policia Kufitare Rinas ndalon dy shtetase (nënë e bijë) të shpallura në kërkim. Me datë 27.04.2016, ora 23:30, u bë ndalimi i dy shtetaseve në kërkim : L. M, 52 vjeçe, banuese në Tiranë. A. M, 28 vjeçe, lindur dhe banuese në Tiranë. Ndalimi i këtyre shtetaseve u bë për arsye se janë shpallur në kërkim, pasi me datë 25.04.2016 ne D. V. P. Tiranë janë paraqitur qytetar të shumtë, të cilët kanë kallëzuar se shtetesja L. M. dhe e bija e saj shtetsja A. M, i kanë mashtruar duke u marrë shuma të konsiderueshme parash me premtimin për punësim në Kanada. Shtetaset e mësipërme i’u dorëzuan Seksionit të Luftës Kundër Krimit Ekonomiko-Financiar për veprime të mëtejshme”, sqaron policia.