Është cilësuar si një nga pikëpyetjet më të mëdhaja të njerëzimit.

Është cilësuar si një nga misteret më të mëdhaja të njerëzimit: Buzëqeshja e famshme e Mona Lisës. Kush është, çfarë fsheh, cila ishte marrëdhënia midis saj dhe Leonardo da Vincit e shumë pyetje të tjera kanë munduar ekspertët, por edhe admiruesit e thjeshtë të artit. Dhe duket se këtij misteri i ka ardhur fundit, pas zbulimeve të reja që janë bërë.

Është Silvano Vinceti, drejtues i Komitetit Kombëtar italian të Promovimit të Historisë dhe Trashëgimisë Kulturore, ai që thotë se Leonardo përdori një modele femër dhe një model mashkull për të krijuar imazhin e Monës. Argumentet, që Vinceti ofron ,mbështeten te verifikimet e bëra trupit të Lisa Gherardinit, që pretendohet të ketë qenë modelja e piktorit për këtë portret. Ato tregojnë se nuk ishte ajo muza e vetme e Leonardos. “Pas një pune kërkimore jashtëzakonisht të kujdesshme, në të cilën kemi kombinuar metodat historike me teknologjinë më të avancuar që ekziston, më në fund ne mund të zgjidhim një mister të hershëm, atë të identitetit të vërtetë të Mona Lisës. Realiteti është se, Leonardo përdori dy modele të ndryshme. E para ishte Lisa Gherardini, e njohur si Mona Lisa del Giocondo. Modeli i dytë ishte një djalë, Gian Giacomo Caprotti, që njihej edhe me emrin Salai. Falë rrezeve infra të kuqe zbuluam gjithashtu se, në shtresën e parë të bojës në telajo, Mona Lisa nuk shihet duke buzëqeshur, por është melankolike dhe e trishtuar”, tha Silvano Vinceti, ekspert arti.

“Mona Lisa”, apo “Gioconda” siç e quajnë italianët, ndodhet sot në Muzeun e Luvrit në Paris, e mund të cilësohet ndoshta edhe si piktura më e famshme në botë.